Indeksi i Biznesit 2025 i Dhomës Amerikane të Tregtisë në Tiranë, i zhvilluar në bashkëpunim me Revistën Monitor,...
BOTA
Pesë vende të fuqishme të BE kërkesë Brukselit: Kush fiton nga lufta, të ndihmojë ata që humbasin
PiranjatPërditësimi i fundit 5 Prill 2026, 11:00
Pesë vende të Bashkimit Evropian kanë kërkuar zyrtarisht nga Komisioni Evropian taksimin e fitimeve ekstra të kompanive energjetike, përfitime këto të nxitura nga kriza në Lindjen e Mesme dhe rritja përkatëse e çmimeve të karburanteve dhe gazit.
Në një letër drejtuar Brukselit, ministrat e Financave të Italisë (Giancarlo Giorgetti), Gjermanisë, Portugalisë, Spanjës dhe Austrisë theksuan se një masë e tillë “do të ishte një sinjal që tregojmë unitet dhe aftësi për të vepruar”. Komisioni Evropian ka reaguar shpejt, duke deklaruar se po vlerëson propozimin dhe se do të japë një përgjigje: “Do të përgjigjemi”.
“Kush fiton nga lufta, le të lehtësojë barrën për të tjerët”
Pesë ministrat e Financave të BE kanë nënvizuar nevojën për një masë të drejtë dhe të domosdoshme ndaj kompanive energjetike në një letër drejtuar komisionerit evropian për klimën, Wopke Hoekstra, më 3 prill. Sipas argumentit të tyre, kjo masë ka dy qëllime: nga njëra anë, tregimi i unitetit evropian në një moment krize, dhe nga ana tjetër, dërgimi i një mesazhi të qartë kompanive energjetike: “Kush përfiton nga pasojat e luftës duhet të bëjë pjesën e vet për të lehtësuar barrën mbi popullsinë”.
Shembulli i vitit 2022
Për të mbështetur më tej propozimin e tyre, ministrat e Financave i kujtuan Wopke Hoekstra një taksë të ngjashme që u vendos në 2022, pas pushtimit rus të Ukrainës, me qëllim të frenimit të rritjes galopante të çmimeve të energjisë.
“Duke marrë parasysh shtrembërimet aktuale të tregut dhe kufizimet buxhetore,” shkruhet në letër, “Komisioni Evropian duhet të hartojë sa më shpejt një instrument të ngjashëm për kontributin në nivel të Bashkimit Evropian, mbi një bazë të fortë ligjore.”
Letra nuk përmend kompanitë që mund të jenë objekt i kësaj mase, as shumën që do të paguhet nga taksa mbi fitimet ekstra. Çdo vendim i mëtejshëm do të lihet në dorë të Brukselit ose do të diskutohet në negociata të ardhshme.
Masa të tjera dhe shqetësimi
Në 2022, Bashkimi Evropian vendosi një seri masash emergjente për të përballuar krizën energjetike. Përveç taksave mbi fitimet ekstra, u vendos edhe një tavan i çmimit të gazit.
Nëse katër vjet më parë BE u pa tepër e varur nga gazi rus, tani shqetësimi lidhet me naftën dhe gazin Persik, ndërsa komisioneri evropian për Energjinë, Dan Jorgensen, ka shprehur veçanërisht shqetësim për furnizimin me produkte të rafinuara si karburanti për avionë dhe dizeli.
Reagimi i Brukselit
Një zëdhënës i Komisionit Evropian deklaroi se letra e ministrave të pesë vendeve, është marrë dhe po vlerësohet: “Po e shqyrtojmë dhe do të përgjigjemi në kohën e duhur”. Ai shtoi se Komisioni po punon ngushtë me shtetet anëtare për masa të mundshme politike që adresojnë krizën aktuale energjetike në Evropë, duke marrë parasysh edhe mësimet e nxjerra nga viti 2022, përfshirë kontributin e përkohshëm të solidaritetit të BE-së. /PiranjatNews/
