Kreu i degës së Partisë Demokratike në Krujë, Aulon Kalaja, ka denoncuar publikisht presione të dyshuara të policisë n...
BOTA
Rusia paralajmëron sulme në Kiev, SHBA sfidon Moskën: Ambasada jonë nuk mbyllet
PiranjatPërditësimi i fundit 28 Maj 2026, 16:34
Shtetet e Bashkuara thanë sot (28 maj) se ambasada e tyre në Kiev do të mbetet e hapur, pavarësisht paralajmërimeve të Rusisë se diplomatët që mbeten në kryeqytetin ukrainas rrezikojnë të jenë në shënjestër.
“Nuk ka pasur asnjë ndryshim në operacionet tona dhe çdo raport që thotë të kundërtën është i rremë”, tha ambasada amerikane në një deklaratë në platformën X. “Departamenti i Shtetit nuk ka përparësi më të lartë se siguria e qytetarëve amerikanë dhe rishikon rregullisht masat e sigurisë në ambasadën në Kiev”.
Ministria e Jashtme ruse të hënën u bëri thirrje qytetarëve të huaj dhe diplomatëve të largohen nga Kievi “sa më shpejt të jetë e mundur”, duke paralajmëruar se ata ishin në rrezik sulmesh me raketa në kryeqytetin ukrainas.
Sekretari i Shtetit i SHBA-së, Marco Rubio, tha të martën se Ministri i Jashtëm rus, Sergei Lavrov, e kishte paralajmëruar atë se Kievi “do të bëhet një vend shumë i rrezikshëm”.
Rubio tha gjithashtu se personeli diplomatik amerikan ishte informuar për rrezikun e shtuar të sigurisë, por nuk tha nëse ishte lëshuar një urdhër evakuimi.
Të enjten, Sergei Shoigu theksoi se paralajmërimi i Moskës ishte “shumë serioz”.
I njëjti vendim nga vendet e Bashkimit Evropian
Vendimi i Uashingtonit për të mbajtur ambasadën e tij të hapur vjen pas një qëndrimi të ngjashëm nga disa vende të Bashkimit Evropian, të cilat kanë hedhur poshtë thirrjet e Kremlinit për t’u tërhequr nga kryeqyteti ukrainas.
“Bashkimi Evropian nuk do të largohet që këtej”, tha të hënën ambasadorja e BE-së në Ukrainë, Katarina Maternova. “Ne do të qëndrojmë në Kiev”, vijoi ajo.
Bashkimi Evropian thirri të martën të ngarkuarën me punë të Rusisë në Bruksel, Karen Malayan, duke kërkuar që Moska “të ndalojë së synuari civilët” dhe të angazhohet në “bisedime të vërteta paqeje, duke filluar me një armëpushim të plotë dhe pa kushte”.
Fundjavën e kaluar, Rusia qëlloi më shumë se 80 raketa në Kiev, duke vrarë të paktën dy persona dhe duke plagosur 87 të tjerë, sipas zyrtarëve ukrainas.
