Situata e zjarreve në Shqipëri vijon të kërkojë ndërhyrje në disa zona të vendit.
Sipas Ministrisë së Mbroj...
BOTA
"Serbia ia ka mohuar vetes të qënurit pjesë e bisedimeve, viktimizimi tani është i kotë", Vengu i përgjigjet Vuçiç: Shqipëria nuk bën traktate të fshehta në dëm të fqinjëve
E.DPërditësimi i fundit 22 Mars 2025, 10:19
TIRANË- Ministri i Mbrotjes, Pirro Vengu i është përgjigjur deklaratave të presidentit serbe, Aleksandër Vuçiç lidhur me Memorandumin e Mbrojtjes të nënshkruar nga Shqipëria, Kosova dhe Kroacia.
Në një postim në "X", Vengu shprehet se Serbia ia ka mohuar vetes mundësinë për të marrë pjesë në konsultime shumëpalëshe. Sipas tij, kjo e bën të kotë çdo narrativë viktimizuese që vjen nga qeveria serbe.
Më tej shton se Shqipëria nuk ka precedente marrëveshjesh ose traktatesh të fshehta në dem të fqinjeve, siç e kanë pasur shtete të tjera. Vengu shkruan se marrëveshja e nënshkruar mes tre shteteve nuk ka asgjë për të fshehur.
Marrëveshja për mbrojtje dhe siguri mes Shqipërisë, Kosovës dhe Kroacisë është një bashkëpunim i natyrshëm mes tre shtetesh sovrane.
Si aleatë kemi një vlerësim të njëmendtë mbi kërcënimet që synojnë të pengojnë të ardhmen evropiane të rajonit tonë. Ndaj kemi vendosur të bashkëpunojmë për të rritur kapacitetet tona mbrojtëse dhe për të mbështetur integrimin e Kosovës në mekanizmat rajonalë.
Serbia, duke ndjekur prej dy vitesh një politikë të karrikes boshe në iniciativat rajonale, ia ka pezulluar në mënyrë të njëanshme vetes mundësinë për të nxitur ose për të marrë pjesë në konsultime shumëpalëshe. Ky pezullim, që është në dorën e Serbisë të lihet mënjanë, e bën të kotë çdo narrativë viktimizuese që vjen nga qeveria serbe.
Në historinë e saj, Shqipëria nuk ka precedente marrëveshjesh ose traktatesh të fshehta në dem të fqinjeve, siç e kanë pasur shtete të tjera. Për rrjedhojë, krahas kureshtjes së ekspertëve të dramave rajonale dhe atyre që mezi presin të gjejnë një vesh për të dëgjuar rënkime, nuk e kemi aspak problem të publikojmë marrëveshjen tripalëshe.
Presidenti serb Aleksandar Vuçiç, ka thënë se Shqipëria dhe Kroacia kanë hapur “një garë armësh” duke nënshkruar memorandum për bashkëpunim në mbrojtje me Kosovën. Vuçiç pretendon se memorandumi përbën “shkelje të marrëveshjes nënrajonale” dhe se është “i bindur se NATO-ja nuk ka qenë e njoftuar për këtë”.
