Një turiste rreth 30 vjeçe nga Finlanda u transportua me urgjencë në Spitalin Rajonal të Vlorës, pasi ka shfaqur probleme t&eu...
BOTA
SHBA nuk ndal hakmarrjen për vrasjen e tre ushtarëve, mbyllet dita e 9 ditë e sulmeve mbi Iran, Trump: Do t’i godasim më fort!
PiranjatPërditësimi i fundit 20 Korrik 2026, 08:32
Ushtria amerikane njoftoi të hënën se ka përfunduar natën e nëntë radhazi të sulmeve ajrore kundër Iranit, duke goditur infrastrukturë ushtarake dhe objektiva strategjike në disa pjesë të vendit.
Në një deklaratë të publikuar në rrjetin social X, Komanda Qendrore e SHBA-së (CENTCOM) bëri të ditur se operacionet kishin në shënjestër qendrat e komandës ushtarake iraniane, sistemet e mbrojtjes ajrore, vendet e mbikëqyrjes bregdetare, kapacitetet detare, bazat e lëshimit të raketave dhe dronëve, si edhe rrjetet e komunikimit.
Sulmet erdhën pas njoftimit për vdekjen e tre ushtarëve amerikanë. Dy prej tyre humbën jetën gjatë një sulmi iranian ndaj një baze amerikane në Jordani, ndërsa një ushtarak tjetër u vra në Irak të shtunën, pas shpërthimit të një droni iranian të rrëzuar.
Presidenti i SHBA-së, Donald Trump, deklaroi se operacionet do të vazhdojnë.
“Do të shohim çfarë do të ndodhë, por do t’i godasim shumë fort përsëri sonte”, u tha ai gazetarëve pas kthimit në Uashington nga finalja e Kupës së Botës, duke shtuar se sulmet kryhen “në nder të tre patriotëve të mëdhenj”.
Nga ana tjetër, Garda Revolucionare e Iranit njoftoi se kishte ndërmarrë një “sulm të papritur” ndaj një qendre komande “armike” në Siri, sipas mediave shtetërore iraniane.
Ndërkohë, ushtria e Kuvajtit bëri të ditur se po përballej me një sulm iranian, duke theksuar se shpërthimet e dëgjuara ishin rezultat i aktivizimit të sistemeve të mbrojtjes ajrore që interceptuan sulmet.
Një ditë më parë, Irani kishte deklaruar se kishte goditur dy baza amerikane në territorin e Kuvajtit.
Edhe Bahreini aktivizoi sirenat e alarmit për raketa në orët e para të së hënës, duke paralajmëruar popullsinë për një sulm të mundshëm iranian.
Në frontin diplomatik, Sekretari amerikan i Shtetit, Marco Rubio, akuzoi Iranin se po përpiqet të përdorë Ngushticën e Hormuzit si mjet presioni ndaj komunitetit ndërkombëtar.
“Është e qartë se Irani, të paktën disa njerëz në Iran, duan të kontrollojnë ngushticën dhe ta përdorin atë si levë kundër botës”, deklaroi Rubio përpara nisjes drejt Filipineve, ku do të marrë pjesë në takimin e ministrave të Jashtëm të ASEAN-it.
Rubio u bëri thirrje aleatëve të SHBA-së të kontribuojnë më shumë në mbrojtjen e transportit detar ndërkombëtar, duke ofruar pajisje ose mbështetje financiare.
Ndërkohë, përshkallëzimi i luftimeve ka bllokuar sërish trafikun në Ngushticën e Hormuzit, një nga rrugët më të rëndësishme të transportit të naftës në botë. Si pasojë, çmimi i naftës Brent u ngjit mbi 90 dollarë për fuçi të hënën, mes shqetësimeve për furnizimin global me energji.
