Kryeministri Edi Rama ka vijuar sulmet ndaj protestuesve që prej javësh janë mbledhur në Tiranë kundër qeverisë së tij...
BOTA
Si sot 81 vite më parë, Hitleri dhe gruaja e tij Eva u vetëvranë në bunkerin nazist, pak orë pas martesës dhe para shembjes së Rajhut të Tretë!
PiranjatPërditësimi i fundit 30 Prill 2026, 12:19
Më 30 prill 1945, Adolf Hitleri; njeriu që tronditi globin, shkaktoi Luftën e Dytë Botërore dhe mbi 60 mln viktima, i mori jetën vetes, duke u fshehur në një bunker nëntokësor poshtë selisë së tij në Berlin.
Ai shoqërohej nga Eva Braun, me të cilën ishte martuar vetëm një ditë më parë. Ajo konsumoi cianur, ndërsa ai, pasi mori edhe helm, qëlloi veten. Më parë kishin vrarë edhe qentë e tyre.
Ky akt ndodhi në një kohë kur disfata e Gjermanisë naziste ishte tashmë e pashmangshme, me forcat aleate që kishin pushtuar vendin nga fronte të shumta dhe ndodheshin vetëm pak metra nga bunkeri i Fyhrerit nazist.
Menjëherë pas vdekjes së tij, Gjermania e Rajhut të Tretë u dorëzua pa kushte, duke shënuar fundin e luftës në Evropë dhe shembjen e vizionit të një “Rajhu 1,000-vjeçar”.
Ditët e fundit në strehën nëntokësore
Që nga janari i vitit 1945, Hitleri ishte tërhequr në bunkerin e tij nëntokësor, i vendosur rreth 8.5 metra poshtë Kancelarisë së Rajhut të Tretë. Hapësira ishte e sigurisë më të lartë, kishte 18 dhoma dhe ishte plotësisht e vetëmjaftueshme në nevojat themelore si uji dhe energjia elektrike.
Pavarësisht situatës, ai vazhdoi deri në momentet e fundit të jepte urdhra dhe të priste bashkëpunëtorët e tij, përfshirë Hermann Göring, Heinrich Himmler dhe Joseph Goebbels.
Një ditë para vdekjes së tij, ai u martua me Eva Braun, duke mbyllur kështu një rreth që përkoi me rënien përfundimtare të regjimit të tij.
Testamenti dhe urdhërimet e fundit
Në testamentin e tij të fundit, Hitleri emëroi Admiralin Karl Dönitz si kreun e shtetit, ndërsa Joseph Goebbels mori postin e kancelarit.
Më pas ai u tërhoq në banesën e tij private me Eva Braun. Atje, sipas provave, të dy konsumuan helm, pasi më parë u kishin dhënë helm qenve të tyre.
Hitleri e përfundoi aktin e tij të vetëvrasjes me pistoletën e tij të shërbimit. Por misteri mbeti pas, sepse mbetjet e trupit të Hitlerit nga djegia e urdhëruar tek oficerët si “amanet” nuk mund ta konfirmonin plotësisht se viktima ishte lideri nazist.
Kjo ngjalli shumë teori konspirative, deri në arratisjen e tij në Argjentinë, por zyrtarisht u deklarua i vdekur, bazuar edhe te dëshmia e oficerit që dogji trupin dhe analizat e mbetjeve trupore dhe atyre dentare.
Fundi i tij shënoi jo vetëm rënien e tij personale, por edhe rënien përfundimtare të një periudhe që la pas shkatërrime të mëdha, gjakderdhje dhe racizëm në shkallë globale.
