Disa prej emrave më të fuqishëm të teknologjisë amerikane do të jenë të pranishëm javën e ardhshme n&e...
BOTA
Trafiku ndërkombëtar i drogës, presidenti i Kolumbisë pjesë e dy hetimeve penale në SHBA
PiranjatPërditësimi i fundit 21 Mars 2026, 18:05
Presidenti i Kolumbisë, Gustavo Petro, është marrë në pyetje në kuadër të disa hetimeve penale nga prokurorë federalë në SHBA, raportoi agjencia Reuters duke cituar një burim të afërt me çështjen.
Sipas të njëjtit burim, Petro nuk është në fokus të drejtpërdrejtë të këtyre hetimeve, por emri i tij ka dalë gjatë hetimeve për narkoterrorizëm dhe trafik droge që po zhvillohen nga zyrat e prokurorit amerikan në Manhattan dhe Brooklyn, në New York. Burimi theksoi se nuk ka një hetim aktiv të përqendruar posaçërisht ndaj tij.
Lajmi u raportua fillimisht nga The New York Times, e cila shkruan se autoritetet amerikane po analizojnë me kujdes disa elementë që lidhen me Petron. Hetimet përfshijnë prokurorë të specializuar në trafikun ndërkombëtar të drogës, si dhe agjentë nga Administrata Kundër Drogës dhe Hetimet e Sigurisë Kombëtare.
Sipas raportimit, hetuesit po verifikojnë ndër të tjera nëse Petro ka pasur kontakte me trafikantë droge dhe nëse gjatë fushatës së tij presidenciale janë kërkuar donacione nga burime të paligjshme.
Nga ana e tij, Petro ka reaguar në rrjetin social X, duke mohuar çdo lidhje me trafikantët e drogës. Ai deklaroi se nuk ka komunikuar kurrë me ta dhe se ka udhëzuar stafin e fushatës që të refuzojë çdo financim të dyshimtë.
“Një hetim i plotë dhe intensiv mbi fushatën time nuk zbuloi asnjë financim nga trafikantët e drogës,” u shpreh Petro.
Ndërkohë, hetimet janë ende në fazat fillestare dhe mbetet e paqartë nëse ato do të çojnë në ngritjen e ndonjë akuze konkrete.
