Ditën e nesërme janë paralajmëruar dy protesta të njëpasnjëshme, në Zvërnec dhe në Tirana, me qytetarët...
BOTA
Tragjedia e shkaktuar nga Izraeli/ Mbi 200 mijë të vrarë e të plagosur në Gaza
PiranjatPërditësimi i fundit 14 Shtator 2025, 17:01
Ahmed, i cili gjithmonë kishte dhënë shenja jete, dje ka heshtur për orë të tëra. Vetëm në orën 21:00 dërgoi një mesazh të shkurtër: “Nuk jam mirë, jam i bllokuar në Gaza.”
Dy ditë më parë kishte hequr dorë nga vendi i tij për t’ia lënë kushëririt 20-vjeçar, të cilit i kanë amputuar këmbën.
“Nuk mund të ecte deri në al-Mawasi. Tani po përpiqem të shpëtoj familjen time, por nuk gjej dot makinë. Kisha prenotuar një, por shoferi nuk erdhi. Situata është katastrofike, bombardimet nuk ndalen, nuk kam parë kurrë diçka të tillë që nga fillimi i luftës”, shkruan ai, ndërsa nata mbulon qytetin e shkatërruar.
Sulmet e IDF nuk lënë asnjë shans. Pallatet shemben njëri pas tjetrit, duke përplasur mbi tendat e refugjatëve breshëri betoni, pluhur e trupa të copëtuar. Vetëm dje, sipas burimeve mjekësore, u vranë 66 persona të tjerë në gjithë Rripin e Gazës.
Ministri i Mbrojtjes Katz e quan këtë ofensivë një “uragan” që i detyron palestinezët të largohen drejt jugut. Por ky evakuuim është në fakt një eksod i dhunshëm i mijëra njerëzve, ku shihen të moshuar, fëmijë dhe të gjymtuar që mezi ecin apo karroca të tëra plot me thasë.
Sipas ushtrisë izraelite, “më shumë se 1/4 e banorëve të Gazës e kanë lënë qytetin”. Nga ana tjetër, autoritetet palestineze bëjnë me dije se mbi 1 milion palestinezë refuzojnë dëbimin e detyruar.
Vetëm 68 mijë u detyruan të lëvizin drejt jugut, por mbi 20 mijë janë rikthyer sërish në veri, sepse atje mungojnë edhe gjërat më elementare për jetesë.
Në këtë betejë propagandash, ajo që mbetet janë jetët e humbura.
Bilanci zyrtar i autoriteteve të Gazës, 64 718 të vrarë dhe 163 859 të plagosur, gjithmonë i kontestuar nga Izraeli, gjen papritur një lloj konfirmimi. Ish-shefi i shtabit të IDF, Halevi, e pranoi publikisht se numri i viktimave të luftës, mes të vrarëve dhe të plagosurve, e kalon shifrën 200 mijë.
Ndërsa Gaza digjet, edhe brenda Izraelit rritet pakënaqësia. Mijëra qytetarë dolën sërish në sheshin Tel Aviv, duke kërkuar lirimin e pengjeve.
“Netanyahu është pengesa e marrëveshjes”, thërrisnin protestuesit.
Por kryeministri këmbëngul se mjafton të eliminohen drejtuesit e Hamasit në Katar për ta përfunduar luftën, sepse sipas tij janë ata që kanë bllokuar çdo përpjekje për armëpushim.
Ky është një pranim i qartë se operacioni kundër Katarit ka dështuar: liderët e Hamasit janë ende gjallë.
Sipas Wall Street Journal, Mossadi kishte kundërshtuar sulmin ndaj një shteti jo-armik, duke paralajmëruar se do të dëmtonte bisedimet dhe marrëdhëniet me emirin e Dohas, i cili për vite ka luajtur rolin e ndërmjetësuesit. Por Netanyahu e shtyu përpara gjithsesi.
Tani sytë janë nga Doha, ku nesër pritet mbledhja e Këshillit të Gjirit, dhe paralelisht në Izrael do të mbërrijë Sekretari i Shtetit i SHBA, Marco Rubio./ La Repubblica
