Surpriza më e madhe e fazës në grupe të këtij Botërori është padyshim Meksika. Një nga tre vendet organizator...
BOTA
Trump për emigrantët somalezë: Nuk i duam, janë plehra
PiranjatPërditësimi i fundit 3 Dhjetor 2025, 08:16
“Nuk i duam në vendin tonë”: Presidenti amerikan Donald Trump nisi një sulm të ashpër verbal ndaj emigrantëve nga Somalia të martën, duke thënë se ata nuk janë të mirëpritur në SHBA.
Ai po fliste në përgjigje të një skandali në shtetin verior të Minesotës, ku, sipas drejtësisë lokale, shuma që vlerësohen se tejkalojnë një miliard dollarë u paguan për shërbime sociale joekzistente, kryesisht përmes faturave fiktive nga amerikanë me origjinë somaleze.
Në Somali, “ata nuk kanë asgjë, e tëra çfarë bëjnë është të vrapojnë dhe të vrasin njëri-tjetrin”, tha Trump gjatë një takimi të kabinetit.
“Vendi i tyre nuk është i mirë për ndonjë arsye. Vendi i tyre është i keq dhe ne nuk i duam ata në vendin tonë”, vazhdoi ai.
Miliarderi republikan shpesh synon pakicat dhe e ka bërë goditjen ndaj imigracionit të paligjshëm një përparësi kryesore, duke nxitur frikën midis disa prej shumicës së bardhë se ata do të humbasin pushtetin e tyre politik, ekonomik dhe kulturor.
“Jemi në një pikë kthese”, tha ai, dhe madje argumentoi se Shtetet e Bashkuara nuk duhet të bëjnë “zgjedhjen e gabuar”, e cila, sipas tij, do të ishte “të vazhdonin të mirëprisnin mbeturinat në vendin tonë”.
Duke argumentuar se somalezo-amerikanët “nuk kontribuojnë asgjë”, ai sulmoi për të njëtën herë Elam Omarin, një kongresmene demokrate nga Minesota, e cila është me origjinë nga Somalia dhe ka qenë një kritike e shpeshtë e administratës së tij.
“Elam Omar është mbeturinë. Miqtë e saj janë mbeturina”, tha Presidenti Trump. “Le të kthehen nga kanë ardhur dhe të zgjidhin problemet e tyre”, tha ai.
Politikani demokrat, shpesh i shënjestruar nga manjati republikan, reagoi nëpërmjet X: “Obsesioni i tij me mua është i frikshëm. Shpresoj që ai të marrë ndihmën (psikologjike) që i nevojitet me dëshpërim.”
Javën e kaluar, presidenti amerikan njoftoi qëllimin e tij për të “ndaluar imigracionin nga të gjitha vendet e botës së tretë” në SHBA, pas sulmit ndaj dy Gardës Kombëtare në Uashington, për të cilin u akuzua një ish-ushtar afgan.
Që në qershor, administrata Trump vendosi një ndalim për hyrjen në territorin e SHBA-së ose kufizime për vizat për qytetarët e 19 vendeve, përfshirë Somalinë.
Somalia, një vend në Bririn e Afrikës, ku 70% e popullsisë përjeton “varfëri shumëdimensionale”, sipas OKB-së, u zhyt në një luftë civile në vitet 1990 që çoi në rënien e shtetit.
