Inspektorati i Lartë i Deklarimit dhe Kontrollit të Pasurive dhe Konfliktit të Interesit (ILDKPKI) raporton se gjatë vitit 2025 ka vijuar ...
BOTA
Vërshime “të paprecedenta” në Japoni: Një i vdekur, disa të zhdukur
E.DPërditësimi i fundit 21 Shtator 2024, 14:40
JAPONI- Shirat e dendur goditën rajonin verior qendror të Notos në Japoni më 21 shtator, duke shkaktuar rrëshqitje të dheut dhe përmbytje, që lanë një person të vdekur dhe disa të tjerë të zhdukur, thanë zyrtarët.
Shirat e rrëmbyeshëm bënë që lumenjtë e fryrë të dilnin nga shtrati, përmbytën shtëpi dhe bllokuan disa banorë në rajonin që ende po rikuperohej nga tërmeti vdekjeprurës i 1 janarit.
Në Suzu, një person humbi jetën dhe një tjetër u zhduk pasi u mor nga përmbytjet. Një tjetër person u zhduk në qytetin e afërt, Noto, sipas autoriteteve të prefekturës.
Në Wajima, katër persona u zhdukën pasi u raportua për rrëshqitjeje dheu. Ata ishin ndër 60 punëtorët që po riparonin një tunel të dëmtuar nga tërmeti i janarit, raportoi NHK, duke shtuar se edhe një person tjetër ishte zhdukur për shkak të përmbytjeve në një vend tjetër të qytetit.
Në qytetin Noto, dy persona u plagosën rëndë ndërsa po vizitonin shtëpinë e tyre të dëmtuar nga tërmeti kur një rrëshqitje dheu i goditi.
Të paktën 16 lumenj në Ishikawa kishin dalë nga shtrati deri të shtunën pasdite, sipas Ministrisë së Tokës dhe Infrastrukturës. Banorët u këshilluan të jenë jashtëzakonisht të kujdesshëm ndaj rrëshqitjeve të mundshme të dheut dhe dëmeve në ndërtesa.
Sugimoto Satoshi nga Agjencia Kombëtare e Meteorologjisë tha se “Ky nivel reshjesh nuk është përjetuar kurrë më parë në këtë rajon. Banorët duhet të sigurojnë menjëherë sigurinë e tyre. Rreziku për jetën e tyre është i pashmangshëm”.
Deri në pasditen e së shtunës, rreth 1.350 banorë po strehoheshin në qendrat e komunitetit, palestrat e shkollave dhe objekte të tjera të qytetit, thanë autoritetet.
Autoritetet parashikojnë deri në 20 centimetra reshje brenda 24 orëve të ardhshme deri në mesditën e së dielës.
“Shira të dendura po godasin rajonin që ishte dëmtuar rëndë nga tërmeti i Notos, dhe besoj se shumë njerëz ndihen shumë të shqetësuar”, tha sekretari i kabinetit, Yoshimasa Hayashi.
Një numër rrugësh të përmbytura nga uji me baltë u bllokuan dhe kompania elektrike Hokuriku njoftoi se rreth 6.500 shtëpi ishin pa energji elektrike. Semaforët kishin dalë jashtë funksionit në zonat e prekura. Shumë shtëpi kishin mbetur edhe pa furnizim me ujë.
Një tërmet me magnitudë 7.6 goditi rajonin më 1 janar, duke vrarë më shumë se 370 persona dhe duke dëmtuar rrugët dhe infrastrukturën kryesore. Pasojat e tij ende ndikojnë në industrinë lokale, ekonominë dhe jetën e përditshme./REL
