Kreu i degës së Partisë Demokratike në Krujë, Aulon Kalaja, ka denoncuar publikisht presione të dyshuara të policisë n...
BOTA
Video/ E rëndë në Itali, mësuesi dhunohet barbarisht nga nxënësit; refuzon t'i denoncojë
PiranjatPërditësimi i fundit 27 Maj 2026, 18:53
Një profesor në institutin teknik “Itis” në Parma është bërë protagonist i një videoje që ka shkaktuar debat të madh në Itali, pasi u përfshi në një incident me një grup adoleshentësh pranë shkollës.
Pamjet, të shpërndara gjerësisht në rrjet, tregojnë mësuesin teksa ddhunohet nga disa nxënës, ndërsa një koleg i tij ndërhyn për ta mbrojtur dhe neutralizon një prej të rinjve.
Tre nxënës janë pezulluar për 30 ditë, por profesori 63-vjeçar ka refuzuar të bëjë kallëzim penal ndaj tyre.
“Më mbajtën për dy orë në komisariat duke u përpjekur të më bindnin të denoncoja. Pothuajse më lutën ta bëja. Por unë e kam thënë dhe e përsëris: asnjë denoncim”, deklaroi ai.
Profesori, që jep mësim prej vitit 1985, këmbëngul se nuk e konsideron ngjarjen një agresion të mirëfilltë.
“Nuk kam pësuar asnjë dëm. Përkundrazi, fakti që nuk denoncoj është një ndërhyrje edukative. Këta djem tashmë e kanë kuptuar mbi lëkurën e tyre se sjelljet e gabuara sjellin pasoja”, tha ai.
Në video dëgjohet mësuesi duke thënë: “Po ju jeni të çmendur?”, ndërsa ndiqet nga disa të rinj pranë parkut përballë shkollës.
Sipas tij, konflikti nisi pasi pa një nxënës duke goditur me shkelm një kanaçe drejt një makine të parkuar dhe e qortoi për sjelljen. Më vonë gjatë ditës, i riu ishte kthyer bashkë me disa shokë dhe situata degradoi në debat dhe tension fizik.
“Është sjellja e një djali 16-vjeçar me ide të ngatërruara dhe jo shumë i zgjuar”, komentoi profesori.
Mësuesi kritikoi gjithashtu ministrin italian të Arsimit, Giuseppe Valditara, i cili reagoi ashpër pas publikimit të videos duke dënuar dhunën ndaj mësuesve.
“Fjalët e tij janë të një personi jokompetent”, deklaroi profesori, duke kujtuar deklarata të mëparshme të ministrit mbi “rolin e poshtërimit” në edukimin e nxënësve.
