Surpriza më e madhe e fazës në grupe të këtij Botërori është padyshim Meksika. Një nga tre vendet organizator...
BOTA
Zgjedhjet e 12 prillit në Hungari, a do i vijë fundi pushtetit të Orbanit?
PiranjatPërditësimi i fundit 1 Prill 2026, 18:29
Në një fushatë intensive dhe të pandalshme në të gjithë Hungarinë, politikani Peter Magyar është shfaqur si sfiduesi më serioz për kryeministrin Viktor Orbán në më shumë se një dekadë.
Me sloganin “Tani”, të frymëzuar nga thirrjet revolucionare të shekullit XIX, ai po përpiqet të mobilizojë votuesit për zgjedhjet e 12 prillit, të cilat sondazhet sugjerojnë se mund t’i fitojë.
45-vjeçari, dikur pjesë e partisë në pushtet Fidesz, ka zhvilluar mbi 100 ndalesa elektorale në të gjithë vendin, duke mbajtur deri në gjashtë fjalime në ditë dhe duke synuar të vizitojë 106 zonat zgjedhore. Ai ka ndërtuar një bazë të fortë mbështetjeje edhe në zona rurale, tradicionalisht bastione të Fidesz, duke përfshirë edhe një marshim simbolik prej 300 kilometrash nga Budapesti deri në kufirin me Rumaninë, për të “bashkuar” kombin.
Magyar premton të luftojë korrupsionin, të përmirësojë ekonominë dhe të rikthejë miliarda euro fonde të ngrira nga Bashkimi Europian, të cilat janë bllokuar, për shkak të shqetësimeve mbi sundimin e ligjit në Hungari.
Ai gjithashtu ka tentuar të bëjë për vete komunitetin rom, një nga grupet më të margjinalizuara në vend. Megjithatë, kundërshtari i tij Viktor Orbán e ka akuzuar si një “kukull” të BE-së dhe Ukrainës, ndërsa Magyar është përpjekur të mbajë një qëndrim të balancuar, duke deklaruar se partia e tij është “forca e vërtetë e paqes”.
Rruga e tij drejt opozitës nisi në mënyrë dramatike në shkurt 2024, kur ai doli publikisht kundër sistemit që dikur e mbështeste, përmes një interviste virale në kanalin YouTube Partizán. Në një vend me rreth 9.6 milionë banorë, rreth një milion njerëz e ndoqën rrëfimin e tij, ku ai shpjegoi zhgënjimin me elitën politike dhe mënyrën e funksionimit të pushtetit.
Intervista e tij erdhi në kulmin e një skandali politik, që çoi në dorëheqjen e presidentes Katalin Novak dhe të ish-bashkëshortes së tij, Judit Varga, e cila kishte qenë ministre e Drejtësisë dhe kishte bashkëfirmosur një falje të diskutueshme presidenciale. Kjo krizë shënoi një pikë kthese për Magyar, i cili deklaroi se nuk donte të ishte më pjesë e një sistemi ku “ata që kanë pushtetin e vërtetë fshihen pas grave”.
I lindur në një familje juristësh dhe me lidhje të forta me elitën politike, Magyar ka qenë për vite të tëra pjesë e strukturave të Fidesz, duke shërbyer si diplomat në Bruksel dhe më pas në poste drejtuese në kompani shtetërore. Megjithatë, zhgënjimi i tij me sistemin u rrit gradualisht, derisa vendosi të bëhej figura që mund të sfidojë nga brenda një nga regjimet më të konsoliduara politike në Europë.
Sot, me një fushatë energjike dhe një mesazh të drejtpërdrejtë për ndryshim, Peter Magyar po përpiqet të bindë hungarezët se momenti për një kthesë historike ka ardhur dhe se kjo mund të ndodhë “tani”.
