“Nuk jeni vetëm”, kanë qenë këto thirrjet e protestuesve ndërsa kanë mbërritur te Blloku i Sigurisë, në...
EDITORIAL
Tirana është marrë peng
PiranjatPërditësimi i fundit 2 Shtator 2026, 17:12
Nga Gentian Gaba
Kryeqyteti me një milion banorë është marrë peng nga brenda burgut të Durrësit, me një kryetar bashkie që sillet si kapot e drogës, të cilët vijojnë të japin urdhra nga pas hekurave, sigurisht, me heshtjen dhe miratimin e Ramës. Sistemi gjyqësor ka hyrë në një ngërç të provokuar nga vetë Rama, i cili qëllimisht nuk miratoi, brenda afatit të 31 korrikut, formulën e re të pagave të kërkuar nga Gjykata Kushtetuese.
Ndërkohë, qytetarët që protestojnë prej më shumë se 90 ditësh kundër korrupsionit dhe kapjes së shtetit dhunohen nga policia. Besimi i njerëzve te shumica në pushtet ka rënë në nivele rekord, madje edhe sipas sondazheve të vetë Partisë Socialiste.
Përballë kësaj stuhie të përsosur, Edi Rama ka zgjedhur rrugën e kaosit. Ai hap fronte dhe beteja të njëpasnjëshme për ta mbajtur vendin në tension dhe për të treguar se është ende njeriu që mund të trazojë politikën, drejtësinë dhe rendin institucional.
Të vetëve po u jep mesazhin se nuk do të dorëzohet pa luftë; prandaj edhe ata që kanë bërë plaçkë përkrah tij nuk duhet të ngurrojnë t’i hapin thasët për betejën që i pret. Në këtë përplasje kërkon të përfshijë edhe të pakënaqurit e Lalit, të cilët kanë ende para për të hedhur dhe punë për të prishur në zgjedhjet vendore, nëse krijohet përshtypja se tutori i tyre është braktisur nga Rama.
Ndërkombëtarëve, ndërkaq, u përcjell një tjetër mesazh, duke u thënë se ai është çelësi i stabilitetit dhe se çdo zgjidhje për të ardhmen e vendit duhet të kalojë përmes tij. Këtu përfshihet edhe reforma aq e dashur në drejtësi, për të cilën partnerët e huaj kanë investuar shumë dhe të cilën sot Rama po përpiqet ta thajë duke i mohuar sistemit pagat e përcaktuara.
Në të njëjtën kohë, përgatit një spektakël populist linçimi kundër gjyqtarëve dhe prokurorëve, duke i paraqitur si armiq të popullit dhe duke i vendosur nën një shantazh të dyfishtë, financiar dhe politik.
Rama e ka bërë zgjedhjen e tij, nuk largohet pa luftuar. Shqiptarët duhet të kuptojnë se nuk mund ta mundin pa u bashkuar.
