Kryeministri Edi Rama ka ndarë mëngjesin e sotëm në rrjetet sociale një video që I është dërguar nga një qyt...
KOSOVA
"Hiqeni qafe në çfarëdo mënyre"/ Deklarata për Albin Kurtin i hap telashe Baton Haxhiut, analisti merret në pyetje
PiranjatPërditësimi i fundit 5 Maj 2026, 17:27
Gazetari dhe analisti Baton Haxhiu raportohet se është marrë në pyetje këtë të martë nga dy hetues në stacionin policor “Qendra” në Prishtinë, lidhur me një deklaratë të bërë prej tij javën e kaluar, në lidhje me kryeministrin Albin Kurti.
Sot, Haxhiu tha se ishte në hetuesi, ku u mor në pyetje në cilësinë e dëshmitarit. “Dhe ajo që pashë nuk ishte vetëm një procedurë, por një keqkuptim që ka marrë formë institucionale”, shkruan ai.
Shkak është bërë një deklaratë në emisionin Pressing në T7 se qytetarët duhet “ta heqin qafe” kryeministrin në detyrë, Albin Kurti, në mënyrë që të vendosin ose t’ia japin 80 mandate për të ngritur institucionet e vendit, ose ta largojnë nga qeverisja.
"Dhe ajo që duhet të them, qytetarët duhet të përgatiten për dy gjëra: ose le t’ia japin njeriut 80 vota, o le të tregojnë se ky nuk është i gatshëm të qeverisë, se kjo nuk ka kuptim më”, ka thënë ai. Pikërisht kjo deklaratë është bërë shkak që Baton Haxhiu të përfundojë në Polici.
Ai është paraqitur në Drejtorinë për Hetimin e Krimit të Organizuar dhe Krimeve të Rënda në stacionin kryesor policor në Prishtinë për “t’u marrë në pyetje lidhur me trajtimin e informacionit”. Gazetari theksoi se prokurori që autorizoi pyetjen e tij e kishte keqlexuar deklaratën në emision.
“Dhe në një moment, në një bisedë që kaloi përtej formalitetit, më thanë se kjo lëndë ishte inicuar nga prokurori. Dhe se për ta vetë kjo ishte obligim profesional. Aty ndjeva keqardhje. Sepse kjo nuk ishte më çështje e një ftese. Ishte çështje e mënyrës se si është lexuar fjala ime.
Dhe kur fjala lexohet gabim nga një qytetar, është keqkuptim. Kur lexohet gabim nga një analist, është debat. Por kur lexohet gabim nga një prokuror dhe kthehet në procedurë, atëherë kemi problem, sepse një prokuror nuk ka luksin e keqleximit”, ka shkruar Baton Haxhiu.
