Në ceremoninë përkujtimore të 80-vjetorit të Kryengritjes së Postribës, deputeti i PD-së, Bardh Spahia, vlerësoi ...
KOSOVA
Policia e Kosovës me njoftim për ata që shkojnë në RMV: Ka nisur monitorimi me kamera inteligjente
PiranjatPërditësimi i fundit 2 Shkurt 2026, 17:48
Policia e Kosovës ka njoftuar qytetarët që kalojnë me automjete në Maqedoninë e Veriut se ka nisur monitorimi përmes kamerave inteligjente që do të evidentojnë çdo shkelje në komunikacion.
“Referuar informacioneve zyrtare të autoriteteve të Maqedonisë së Veriut, përmes mekanizmit elektronik të quajtur “Qyteti i sigurt”, ka filluar monitorimi i komunikacionit rrugor në Maqedoninë e Veriut. Sipas tyre, monitorimi i komunikacionit rrugor bëhet përmes pajisjeve teknike dhe kamerave inteligjente, të cilat evidentojnë automatikisht shkeljet e dispozitave të komunikacionit, në përputhje me legjislacionin përkatës të Maqedonisë së Veriut”, thuhet në njoftim.
Policia thotë se “ky sistem në fazën e parë do të zbatohet në qytetin e Shkupit, Tetovës dhe Kumanovës, si dhe përgjatë Korridorit 8 dhe Korridorit 10, ku do të evidentohen shkeljet si: tejkalim i shpejtësisë së lejuar, kalim në semafor të kuq, ndalim dhe parkim i parregullt si dhe qarkullim me automjet të paregjistruar”.
“Për automjetet me targa të huaja ku bën pjesë edhe Kosova, nëse shtetasi i huaj kryen shkelje të konstatuar nga sistemi “Qyteti i sigurt”, parashihet njoftim gjatë hyrjes dhe daljes nga shteti i Maqedonisë së Veriut. Të drejtën për pagesën e pesëdhjetë përqind të gjobës brenda afatit prej tetë ditësh e gëzojnë edhe qytetarët e huaj, ndërsa në rast mospajtimi me shkeljen ose mosrealizimit të pagesës, iniciohet procedurë kundërvajtëse për të huaj para gjykatës kompetente”, thuhet në njoftim.
Këtë njoftim, Policia e Kosovës tha se po e bën me qëllim që qytetarët të kenë kujdes dhe t’i respektojnë dispozitat ligjore gjatë shkuarjes dhe qëndrimit në RMV.
