Qytetarë, ambientalistë dhe aktivistë të shoqërisë civile janë mbledhur këtë mbrëmje në Tiranë p&e...
KOSOVA
"Ne po përgatitemi për sulmin e tyre", Vuçiç viktimizohet për aleancën Kosovë–Shqipëri–Kroaci
PiranjatPërditësimi i fundit 12 Mars 2026, 23:04
Presidenti i Serbisë, Aleksandar Vuçiç, ka shprehur shqetësim për bashkëpunimin ushtarak mes Kosovës, Shqipërisë dhe Kroacisë. Në një intervistë për RTS, ai tha se marrëveshja e mbrojtjes mes këtyre vendeve ngre dyshime për qëllimet e saj.
Vuçiç tregoi se për këtë çështje ka biseduar me kryeministrin kroat, Andrej Plenkoviq, gjatë një takimi në Indi. Sipas tij, Plenkoviqi i ka thënë se bashkëpunimi nuk është i drejtuar kundër Serbisë.
Megjithatë, presidenti serb theksoi se mbetet i shqetësuar për zhvillimet në rajon.
“Nuk jam Donald Trump, Vladimir Putin, presidentë të mëdhenj që i zgjidhin të gjitha me lehtësi. Për mua nuk ka gjëra të lehta dhe natyrisht që kam frikë. Unë dua paqe, jo luftë dhe konflikte”, tha Vuçiç.
Ai kritikoi krijimin e një bashkëpunimi ushtarak mes Prishtinës dhe Zagrebit, duke thënë se “kur krijoni një aleancë ushtarake me një entitet dhe nuk keni shpjegim pse e keni bërë, ndërsa për ne është e qartë pse, sigurisht që ekziston një dozë shqetësimi”.
Duke folur për balancën ushtarake në rajon, Vuçiç theksoi se Serbia nuk e nënvlerëson forcën e shteteve të tjera, por as ushtrinë e saj. Ai shtoi se vendi i tij posedon kapacitete ushtarake që nuk janë bërë publike.
“Për një vit dëgjoni historinë se Serbia ka blerë ‘Rafale’ të përdorur, ndërsa ata të rinj, se do të marrin raketat ‘Meteor’ dhe se janë gjithnjë e më të fortë se ne. Ne heshtim. Unë them – po, sepse jeni të fortë, prandaj edhe kam atë dozë frike kur formoni aleanca ushtarake”, u shpreh ai.
Vuçiç madje deklaroi se Serbia po përgatitet për mundësinë e një sulmi nga një aleancë e mundshme mes Prishtinës, Tiranës dhe Zagrebit.
“Ata po presin momentin kur do të na sulmojnë”, tha ai, duke shtuar se Serbia ka “mjaftueshëm fuqi parandaluese për dy shtete dhe një entitet”.
Në intervistë, presidenti serb foli edhe për “Kasapin e Ballkanit”, Sllobodan Millosheviq. Ai e përshkroi atë si një politikan inteligjent, por që sipas tij bëri gabime të mëdha politike.
“Ishte politikan inteligjent, por bëri gabime serioze politike”, tha Vuçiç, duke shtuar se nuk është i sigurt nëse Millosheviqi i kuptoi plotësisht pasojat e zhvillimeve që çuan në bombardimet e NATO në vitin 1999.
Vuçiç foli edhe për ish-komandantin serb të Bosnjës, Ratko Mlladiq, duke thënë se roli i tij do të vlerësohet nga historia.
“Gjithmonë do t’ia lë historisë të gjykojë. Secili prej nesh ka anët e tij të mira dhe të këqija”, tha ai.
