Protestat studentore në Shqipëri kanë hyrë sot në ditën e 14-të radhazi, ndërsa një numër i madh të rinjs...
LIFESTYLE
E dëshpëruar për para, gruaja kontakton “shtrigën” nga Shqipëria dhe shpikin aksidentin me dy persona të plagosur. Si u zbardh misteri
PiranjatPërditësimi i fundit 7 Maj 2026, 19:27
Pesë persona, katër burra dhe një grua, mes tyre edhe djali i kësaj të fundit, përfunduan nën akuzë pasi kishin simuluar një aksident rrugor për të përfituar dëmshpërblimin e siguracionit. Çështja ndaj tre prej të pandehurve u nda veçmas, ndërsa sot nëna dhe djali u dënuan për simulim krimi: ajo, 56 vjeçe, me tetë muaj burg, ndërsa ai, 33 vjeç, me një vit burgim me pezullim të dënimit. Aksidenti i rremë ishte inskenuar mbrëmjen e 4 shkurtit 2019 në rrugën provinciale 591 Cremasca.
Atë ditë, gruaja dhe djali i saj ndodheshin në një makinë “Hyundai” të drejtuar nga gruaja. Mjeti dyshohej se kishte përplasur dy çiklistë, një 39-vjeçar dhe një 50-vjeçar nga Palermo, të cilët kishin mbetur të plagosur rëndë. Plagët ishin reale, por dëmtimet e marra, përfshirë fraktura të rënda, nuk rezultuan të përputhshme me një aksident automobilistik. Edhe dëmet në makinë iu dukën të dyshimta policisë rrugore; tepër të lehta për të shkaktuar plagë kaq serioze te çiklistët.
Nga pamjet e kamerave të zonës doli në pah e vërteta: në video shihej një makinë e errët nga e cila zbritën dy persona që hynë në zonën artizanale të Montodine dhe dolën duke shtyrë dy biçikleta, të cilat më pas i vendosën përgjatë rrugës. Pamjet treguan më pas makinën e të pandehurës duke përplasur biçikletat. Menjëherë pas kësaj, nga makina tjetër e errët zbritën dy burra që çalonin dukshëm dhe u shtrinë në asfalt përpara makinës së 56-vjeçares. Në video u shfaq edhe një makinë e tretë, me ngjyrë të bardhë, që vinte nga Montodine. Ajo ngadalësoi shpejtësinë dhe, pasi bëri sinjale me drita personave pranë makinës së errët, qëndroi e ndaluar me dritat ndezur në rrugën provinciale.
56-vjeçarja, gjatë hetimeve, deklaroi se rreth njëzet ditë para simulimit të aksidentit kishte kontaktuar një të njohur shqiptar me nofkën “Shtriga”, i cili mbeti i paidentifikuar, dhe i kishte treguar për problemet e saj ekonomike. Sipas saj, ishte pikërisht ai që i kishte propozuar të inskenonte një aksident rrugor për të përfituar një pjesë të dëmshpërblimit të siguracionit, duke rënë dakord që 20% e shumës së përfituar t’u jepej dy “të plagosurve” të rremë. Ai gjithashtu i kishte kërkuar që të shoqërohej nga djali i saj si ndërmjetës, pasi personat me të cilët duhej të merreshin vesh “nuk kishin dëshirë të flisnin me gra”.
Nën akuzë, së bashku me nënën dhe djalin, përfunduan edhe dy çiklistët, të cilët policisë rrugore i kishin deklaruar se ishin përplasur ndërsa po udhëtonin me biçikletë në rrugën provinciale, si edhe një 39-vjeçar nga Milano, i cili dyshohet se kishte vënë në dispozicion ambientet e një restoranti për organizimin e aksidentit të rremë dhe kishte paguar hotelin për dy çiklistët falsë. Mbetet ende mister se si dy të fundit mund t’i kenë marrë ato plagë të rënda. /PiranjatNews/
