Teksa vizitoi Edison Adrin, efektivin e plagosur rëndë në Spitalin e Traumës në Tiranë, kryepolici Skënder Hita bëri e...
LIFESTYLE
UFO-t janë mes nesh? FBI e cilëson reale foton që po qarkullon në rrjet
PiranjatPërditësimi i fundit 13 Maj 2026, 18:18
Publikimi i fundit i dokumenteve të deklasifikuara nga Departamenti amerikan i Luftës mbi rastet e raportuara të UFO-ve dhe objekteve të paidentifikuara fluturuese ka rikthyer sërish në vëmendje debatet për fenomenet e pashpjegueshme, duke ndezur interesin e studiuesve dhe teoricienëve të konspiracionit.
Në këtë klimë diskutimesh, është rikthyer edhe një fotografi misterioze e realizuar më 6 maj 2011 nga një efektiv policie në Tajvan, e cila prej vitesh konsiderohet si një nga imazhet më enigmatike të lidhura me fenomene të paidentifikuara.
Sipas raportimeve, fotografia është shkrepur pranë një liqeni të izoluar në Malet Qendrore të Tajvanit, gjatë një patrullimi rutinë. Polici, i cili po fotografonte peizazhin me telefonin e tij, nuk kishte vënë re asgjë të pazakontë në momentin e shkrepjes.
Megjithatë, më vonë, gjatë rishikimit të imazheve, ai ka vënë re një detaj të çuditshëm në njërën prej fotografive.
Në sfondin e peizazhit malor shfaqet një figurë humanoide, e gjatë dhe gjysmë transparente, me forma të pazakonta që shumë e kanë interpretuar si të papërshtatshme për anatominë njerëzore. Sipas përshkrimeve, figura duket me kokë të zgjatur, gjymtyrë jo proporcionale dhe detaje që ngjajnë me një strukturë të panjohur biologjike.
Fotografia u bë shpejt objekt debatesh në internet dhe në komunitetet që merren me UFO-t dhe fenomenet paranormale. Ndërsa disa e konsideruan si provë të mundshme të një pranie të panjohur, skeptikët kanë sugjeruar se mund të bëhet fjalë për një alpinist të kapur në distancë, një efekt optik apo një manipulim të imazhit.
Shoqata Ufologjike e Tajvanit (TUFOS) ka deklaruar se ka kryer analiza të detajuara mbi fotografinë për më shumë se një vit, duke mos gjetur shenja të ndërhyrjes apo manipulimit dixhital. Edhe analiza të pavarura, sipas raportimeve, kanë arritur në përfundime të ngjashme.
Megjithatë, debatet mbeten të hapura. Disa ekspertë kanë ngritur mundësinë e efekteve teknike si mbivendosja e imazheve, ndërsa të tjerë e konsiderojnë të pamundur që një defekt i tillë të krijojë një figurë kaq të qartë dhe të pozicionuar në mënyrë të tillë në peizazh.
Pavarësisht teorive të ndryshme, fotografia vijon të mbetet një nga rastet më të diskutuara në fushën e fenomeneve të paidentifikuara, ndërsa rikthimi i interesit global për UFO-t ka bërë që ajo të qarkullojë sërish gjerësisht në debatet publike dhe studimore.
