"Do t’i dorëzohet KQZ-së për të denoncuar masakrën elektorale!" Krijohet peticioni për mbledhjen e firmave për "vjedhjen" e votës së diasporës

TIRANA- Këshilli Drejtues i Partisë Demokratike – Dega Selanik, në bashkëpunim me të gjitha strukturat e saj, kanë hapur një peticion online për të mbledhur firmat e emigrantëve për atë që e konsiderojnë si "vjedhja" e votës së diasporës.

Në përshkrimin e faqes i bëhet thirrje të gjithë demokratëve dhe shqiptarëve në Greqi dhe në çdo cep të diasporës shqiptare që të ndrihen e të mos heshtin për të kërkuar transparencë, drejtësi dhe llogari.

Gjithashtu në përshkrim thuhet se peticioni duhe të nënshkruhet që t’i dorëzohet Komisionit Qendror të Zgjedhjeve dhe Presidentit të Republikës së Shqipërisë, për të denoncuar zyrtarisht atë që demokratët e konsiderojnë si masakër elektorale.

Përshkrimi në faqen për Peticionin e Diasporës për Hetim mbi Vjedhjen e Votës:

Këshilli Drejtues i Partisë Demokratike – Dega Selanik, në bashkëpunim me të gjitha strukturat e saj, ngre zërin e të vërtetës dhe u bën thirrje të gjithë demokratëve dhe shqiptarëve të ndershëm në Greqi dhe në çdo cep të diasporës shqiptare:

Të ngrihemi! Të mos heshtim!

Në emër të votës së lirë, të nëpërkëmbur nga një pushtet i korruptuar.

Në emër të mijëra qytetarëve të ndershëm që votuan me shpresë, por që vota iu mohua, iu deformua, iu vodh.

Ne, bijtë dhe bijat e Shqipërisë së vërtetë, që jetojmë larg atdheut, por e mbajmë në shpirt çdo ditë, kemi të drejtë të votojmë dhe të dëgjohemi.

Kërkojmë transparencë, drejtësi dhe llogari.

Kërkojmë të njihet e vërteta e votës së diasporës – jo si një shifër formale, por si një akt dinjiteti kombëtar!

Prandaj, ftojmë çdo shqiptar me ndërgjegje të nënshkruajë PETICIONIN ZYRTAR, që do t’i dorëzohet Komisionit Qendror të Zgjedhjeve dhe Presidentit të Republikës së Shqipërisë, për të denoncuar zyrtarisht këtë masakër elektorale.

Nga Selaniku, Athina, Neapoli e deri në Romë, Berlin, Londër, Neë York – diaspora shqiptare nuk do të heshtë!

Do të flasim me një zë.

Do të ngrihemi me një qëllim.

Dhe do të dëgjohemi me forcën e të drejtës!

diaspora