Një aksident rrugor është regjistruar paraditen e kësaj të enjte (4 qershor 2026) në Tiranë, pranë Fabrikës s&eum...
POLITIKE
Gara me kohën/ Veliaj ankohet në Kushtetuese, por Qeveria ia pret hovin – e dërgon shkarkimin në KQZ
PiranjatPërditësimi i fundit 29 Shtator 2025, 17:56
Erion Veliaj, këtë të hënë ka kundërshtuar në Gjykatën Kushtetuese shkarkimin e tij nga detyra si kryetar i bashkisë së Tiranës. Në ankimin e tij, theksohet se neni 62 i ligjit për qeverisjen vendore nuk mund të zëvendësojë nenin 115 të Kushtetutës, por duhet interpretuar gjithmonë në përputhje me të.
Sipas kërkesës së Veliajt, çdo shkarkim pa një shkelje të rëndë të provuar është i paligjshëm dhe bie ndesh me parimet kushtetuese. Në kërkesë janë renditur 15 argumente që kundërshtojnë shkarkimin e tij nga detyra.
Çështja kryesore që Gjykata duhet të vlerësojë është nëse procesi i shkarkimit ka respektuar kompetencat dhe garancitë që Kushtetuta parashikon.
Këshilli Bashkiak i Tiranës votoi 6 ditë më parë pro shkarkimit të Veliajt, pas një mungese 7-mujore në detyrë, për shkak se ndodhet nën arrest me burg nga SPAK. Vendimi për shkarkimin u firmos nga Këshilli i Ministrave më 25 shtator, duke i hapur rrugën zgjedhjeve të reja për Bashkinë e Tiranës.
Kryeministri, në Asamblenë e Partisë Socialiste, bëri publik emrin e Ogerta Manastirliut si kandidate për të qenë pasuesja e Veliajt. Kjo deklaratë e numrit 1 të qeverisë erdhi në sintoni me SPAK, pasi një ditë para asamblesë, dosja e kryebashkiakut u dërgua për gjykim për 13 vepra penale, nga të cilat 9 raste lidhen me korrupsionin. Qeveria i ka dërguar zyrtarisht Komisionit Qendror të Zgjedhjeve vendimin për shpalljen e vakancës në krye të Bashkisë së Tiranës, duke i hapur rrugë procedurave për organizimin e zgjedhjeve të reja.
Pavarësisht se Erion Veliaj ka depozituar një ankim në Gjykatën Kushtetuese për të kundërshtuar shkarkimin, Qeveria nuk ka ndërmend të ndalë procesin./piranjat.al
