Një aksident i rëndë ka ndodhur sot (4 qershor), në aksin Krutje-“Pushimi i shoferit”, në rrugën Lushnjë-Fier.
...
POLITIKE
Integrimi i vendit në BE, Meta: Ekzaltimi fals i Ramës për grupkapitujt, tregues i hipokrizisë dhe papërgjegjshmërisë së tij për këtë proces
r.llPërditësimi i fundit 1 Nëntor 2024, 20:19
ilir meta
TIRANË- Presidenti i Partisë së Lirisë, Ilir Meta ka reaguar nga burgu për hapjen e negociatave për integrimin e Shqipërisë në Bashkimin Europian.
Në reagimin e postuar në llogarinë e tij në Facebook, Meta thotë se ekzaltimi fals i kryeministrit Edi Rama për grupkapitujt, pasi sipas tij bllokoi integrimin europian të vendit për një dekadë, është tregues i hipokrizisë dhe papërgjegjshmërisë të tij për këtë proces.
Ai thotë se Shqipëria nënshkroi Marrëveshjen e Stabilizim Asocimit më 2006, para Malit të Zi, Serbisë dhe vendeve të tjera, që e nënshkruan atë vite më pas, ndërsa ata negociatat i çelën më herët se vendi ynë. Kjo sepse, sipas ish-presidentit, Shqipëria ka problem kapjen e shtetit nga mafia dhe "sidomos kapjen e drejtësisë, e cila nga një reformë me 140 vota, përfundoi me 69 vota."
POSTIMI I ILIR METËS:
Ekzaltimi fals i Kryeministrit Rama për grupkapitujt, pasi e bllokoi integrimin europian të vendit për një dekadë është tregues i hipokrizisë dhe papërgjegjshmërisë të tij dhe bandës së “Rilindjes” për këtë proces që duhej të ishte përmbyllur prej kohësh. Shqipëria nënshkroi Marrëveshjen e Stabilizim Asocimit më 2006, para Malit të Zi, Serbisë dhe vendeve të tjera, që e nënshkruan atë vite më pas.
Ndërkohë ato i çelën negociatat më 2012 dhe 2014 dhe janë në një stad shumë më të avancuar edhe pse kishin problem me Gjykatat Ndërkombëtare dhe konflikte ndëretnike. Ndërsa Shqipëria ka patur e ka vetëm një problem, kapjen e shtetit nga mafia dhe sidomos kapjen e drejtësisë, e cila nga një reformë me 140 vota, përfundoi me 69 vota dhe betime gjyqtarësh te noteri te Lana.
Ndaj indekset e drejtësisë janë më zi se Vietnami komunist apo Bjellorusia e Lukashenkos. Ky zhvillim edhe pse shumë i vonuar është vetëm për arsye gjeopolitike dhe se s’mund të vazhdojë më shumë.
Ndërsa premtimi solemn se brenda tre vitesh do mbyllen negociatat është fiks si premtimi i mbajtur para ardhjes në pushtet të “Rilindjes” për “shëndetësinë falas” apo premtimi se brenda një mandati do zgjidhej problemi i ujit të pijshëm në të gjithë vendin. Beteja e Partisë së Lirisë dhe opozitës të vërtetë kundër kapjes së shtetit dhe rikthimit të llogaridhënies do të zhbllokojë edhe procesin e integrimit europian.
