Një foto e siguruar së fundmi hedh dritë mbi momentet e fundit të 34-vjeçarit Eglant Koçi përpara se të humbte &cc...
POLITIKE
Irani i kundërpërgjigjet Ramës: Dëgjo qytetarët që bërtasin "Rama ik", mos shpik armiq imagjinarë
PiranjatPërditësimi i fundit 9 Qershor 2026, 18:21
Tensionet mes Tiranës dhe Teheranit janë thelluar edhe më tej, pasi zëdhënësi i Ministrisë së Jashtme të Iranit, Esmail Baghaei, ka reaguar ndaj deklaratave të kryeministrit Edi Rama lidhur me dezinformimin dhe atë që ai e ka cilësuar si luftë hibride nga ana e Iranit.
Përmes një postimi në rrjetin social X, Baghaei iu drejtua Ramës me tone të ashpra, duke thënë se ishte vetë kryeministri shqiptar ai që kishte nisur përplasjen publike dhe se tashmë duhet të përballet me pasojat e saj.
Zyrtari iranian e akuzoi kreun e qeverisë shqiptare se po përdor Iranin për të larguar vëmendjen nga problemet e brendshme dhe pakënaqësitë e qytetarëve. Sipas tij, shqiptarët janë në gjendje të gjykojnë vetë dhe të dallojnë faktet nga pretendimet politike.
Më tej, Baghaei deklaroi se qeveria shqiptare nuk duhet të fajësojë aktorë të jashtëm për reagimet dhe kritikat që vijnë nga opinioni publik, ndërsa i bëri thirrje Ramës të dëgjojë zërat e protestuesve në vend.
Reagimi vjen pasi kryeministri Edi Rama akuzoi Iranin për përhapje të narrativave të rreme lidhur me debatin për projektin në Zvërnec, duke e lidhur këtë edhe me sulmet kibernetike që goditën Shqipërinë në vitin 2022. Rama ka deklaruar se vendi nuk do të tërhiqet përballë kërcënimeve, presioneve apo fushatave të dezinformimit.
Ditët e fundit shkëmbimi i akuzave mes dy palëve është përshkallëzuar, me Teheranin që ka mohuar çdo përfshirje në debatin për Zvërnecin dhe ka ironizuar deklaratat e kryeministrit shqiptar lidhur me ndikimin iranian në këtë çështje.
