Një aksident i rëndë ka ndodhur sot (4 qershor), në aksin Krutje-“Pushimi i shoferit”, në rrugën Lushnjë-Fier.
...
POLITIKE
Presidenti serb mbërrin në Moskë për të marrë pjesë në Paradën e Fitores/ Vuçiç pritet të takohet edhe me Putin
e. dPërditësimi i fundit 7 Maj 2025, 17:49
MOSKË- Presidenti i Serbisë, Aleksandar Vuçiç, ka arritur në Moskë më 7 maj, sipas pamjeve të publikuara nga televizioni shtetëror rus. Udhëheqësi serb do të marrë pjesë në Paradën e Fitores në Sheshin e Kuq.
Avioni i tij, gjatë udhëtimit drejt kryeqytetit rus më 7 maj, u ndal fillimisht në kryeqytetin e Azerbajxhanit, Baku, njofton Radiotelevizioni i Serbisë, duke iu referuar agjencisë Tanjug. Sipas RTS-së, avioni me të cilin po udhëtonte Vuçiçi, më pas ka vazhduar fluturimin drejt Moskës.
Sipas Kremlinit, më 9 maj është paraparë një takim dypalësh ndërmjet presidentit të Serbisë, Aleksandar Vuçiç, dhe presidentit të Rusisë, Vladimir Putin, raportoi RTS. Në fillim të marsit, Vuçiç njoftoi se do të merrte pjesë në paradën ushtarake me rastin e Ditës së Fitores kundër fashizmit, pas një bisede telefonike me Putinin.
Rusia më 9 maj shënon 80-vjetorin e fitores kundër fashizmit në Luftën e Dytë Botërore me një paradë ushtarake në Sheshin e Kuq në Moskë, si dhe me një sërë aktivitetesh të tjera. Paralajmërimet për udhëtimin e presidentit serb në Rusi kanë ngjallur reagime edhe nga institucionet evropiane.
Komisionarja për Zgjerim e Bashkimit Evropian, Marta Kos, më 29 prill deklaroi në një konferencë për media se “është në dorën e presidentit të Serbisë të vendosë për shkuarjen në Moskë”, por shtoi se, nëse Vuçiç shkon atje, ajo do ta ketë “shumë më të vështirë t’i ndihmojë Serbisë të qëndrojë e përkushtuar në rrugën evropiane”.
Nga liderët evropianë, vetëm Vuçiç dhe kryeministri sllovak, Robert Fico – i njohur për lidhjet e tij me Kremlinin – kanë konfirmuar pjesëmarrjen. Edhe Milorad Dodik, president i entitetit Republikës Sërpska në Bosnje e Hercegovinë, ka paralajmëruar pjesëmarrjen në Moskë. Në Rusi do të udhëtojë edhe presidenti i Kinës, Xi Jinping.
Sipas agjencisë shtetërore ruse RIA Novosti, pjesëmarrjen në paradën e 9 majit e kanë konfirmuar edhe presidentët e Bjellorusisë, Alayksandr Lukashenka, i Kazakistanit, Qasim-Zhomart Tokajev, i Azerbajxhanit, Ilham Alijev, i Venezuelës, Nikolas Maduro si dhe presidenti i Brazilit, Luiz Inacio Lula da Silva. Nga vendet afrikane, përfaqësues do të kenë Kongoja dhe Burkina Faso./REL
