Qytetarët e Durrësit janë mbledhur sot para bashkisë, duke protestuar kundër ndërtimeve në Zvërnec. Me pankart...
POLITIKE
"Qeveria po shmang përgjegjësinë"/ Këlliçi akuza ndaj Koçiut: Ministrja e Brendshme mashtron publikisht
PiranjatPërditësimi i fundit 9 Tetor 2025, 11:56
Gjatë seancës parlamentare, deputeti i Partisë Demokratike, Belind Këlliçi, ka akuzuar mazhorancën se po injoron qëllimisht përgjegjësinë për ngjarjen e rëndë që ndodhi në Gjykatën e Apelit, ku humbi jetën gjyqtari Astrit Kalaja. Këlliçi e cilësoi këtë si një dëshmi të pasigurisë në institucionet e drejtësisë, ndërsa kërkoi që qeveria të marrë përgjegjësinë për pasojat e ngjarjes tragjike.
Në fjalën e tij, Këlliçi akuzoi ministren e Brendshme, Albana Koçiu, për mashtrime publike dhe për përpjekje për t'u shmangur nga përgjegjësia e saj. Ai theksoi se arrestimi i një efekti policie, i cili është marrë në pyetje për ngjarjen, është një provë e mëtejshme e dështimit institucional për të garantuar sigurinë në institucione të drejtësisë.
Deputeti i PD-së gjithashtu denoncoi qëndrimin e qeverisë si hipokrit, duke e lidhur këtë me përpjekjet për rehabilitimin e figurave të diktaturës dhe sjelljen arrogante të disa ministrave të qeverisë në raport me opozitën.
Këlliçi:
Është absurde kjo që bëni, ndërkohë që dëgjoni dhe kaloni në lupë çdo fjalë të opozitës, ndërsa nuk dëgjoni mashtrimet, shpifjet, fyerjet e ministres së Brendshme, e cila mishëron më së miri modelin tuaj, duke nisur nga propaganda. Po flasim për një ministre, e cila aktin e parë të saj në zyrë e ka pasur shkarkimin e zëvendësministrit sepse piu duhan. Ndërkohë, ajo refuzon të thotë një fjalë për gjyqtarin... E njëjta ministre refuzon të mbajë përgjegjësi për vrasjen e një gjyqtari në sallë të gjyqit e padëgjuar në botë.
Sapo gënjeu sërish. Tha se nëse do të kishte përgjegjësi një punonjës i Policisë së Shtetit, do të kishte pasur arrestim. I ka parë lajmet e djeshme? Një polic roje është arrestuar dje. Sërish ka gënjyer.
E nisëm me një ndjesë për atë tentativë që bëtë për rehabilitimin e figurës së Enver Hoxhës, që në fakt mishëron kulturën politike të njeriut rilindas, që e mishëruan këta që folën pak më parë, me në krye ministrin e Drejtësisë një militant të cilit për herë të parë iu dha mundësia për të folur, dhe u pa qasja, sjellja, kërcitja e dhëmbëve dhe presioni që ushtronte.
