Kryetari i Partisë Demokratike, Sali Berisha, ka folur për mediat para Kuvendit, ku ka kundërshtuar mënyrën se si, sipas tij, po proc...
POLITIKE
Thirrja e Ramës në GJKKO, Gjokutaj: Ishte domosdoshmëri që gjykata nuk mund ta anashkalonte
PiranjatPërditësimi i fundit 15 Prill 2026, 14:20
Avokati i Sali Berishës, Genc Gjokutaj ka deklaruar se thirrja e kryeministrit Rama nga GJKKO për të dëshmuar në procesin e dosjes “Partizani” ishte një domosdoshmëri që nuk mund të anashkalohej.
Në një prononcim për mediat pas seancës së sotme, avokati deklaroi se Rama duhet të ishte thirrur që në fillim të hetimeve, por theksoi se gjykata nuk kishte pranuar provat e paraqitura prej tyre, që sipas Gjokutajt vërtetonin thirrjet e Ramës për procedim të Berishës.
“Për herë të parë thirret Edi Rama në procesin Berisha, ndërkohë që duhet të ishte thirrur që në fillim dhe gjykata me vendimin e saj për të lehtësuar Ramën, nuk ka pranuar provat që kemi paraqitur në formën e kërkuar nga ligji, provat që vërtetojnë thirrjet që Rama ka bërë nga Asambleja dhe forumet e tjera që të procedohet Sali Berisha.
Ky është një vendim i padrejtë i gjykatës, sepse gjykata ka marrë një vendim në fillim dhe ka thënë që do shprehet në lidhje me këto kërkimet tona, pra për mantelin politik të kësaj çështje në vendimin përfundimtarë. Ndërkohë që nuk pranoi të merret provat, CD, që vërtetojnë pretendimin tonë që kjo nuk është cështje ligjore, por është kryekëput politike e iniciuar dhe e nxitur nga Rama.
Thirrja e Ramës ishte domosdoshmëri dhe mungesë e hetimit, pasi Prokuroria në hetim ka thirrur komisionin e kthimit të pronave, ka thirrur njerëz që kanë marrë urdhër nga Rama dhe nuk ka thirrur urdhërdhënësin që është Rama vetë. Kështu që thirrje Ramës ishte domosdoshmëri që gjykata nuk mund ta anashkalonte”, tha Gjokutaj, i cili shtoi se “sipas radhës do të presim që edhe ai të japë dëshminë e tij”.
