Pas denoncimit të Arben Ahmetajt, mediat reagimet ishin të shumta. Por mbi të gjitha, në të njëjtën kohë që Arben A...
SOCIALE
Bonus-malus ul siguracionet për shoferët e mirë
PiranjatPërditësimi i fundit 19 Prill 2026, 10:56
Ndikimi i skemës së re të sigurimit të makinave bonus-malus, e cila nisi të zbatohej vitin e kaluar, ka filluar të ndihet prej të gjithë aktorëve të tregut, qytetarët dhe kompanitë e sigurimit.
Sipas skemës së re, çmimi i siguracionit do të përcaktohej mbi bazën e 7 faktorëve të riskut, historikut të aksidenteve, fuqisë motorike, moshës së shoferit, eksperiencës në drejtimin e makinës, vjetërsisë dhe qarkut të regjistrimit të mjetit, si dhe nëse makina është në pronësi të një individi apo biznesi. Të gjitha aksidentet e shkaktuara nga shoferët para vitit 2025, nuk do të merren për bazë në përllogaritjen e primit, por vetëm aksidentet e shkaktuara nga 2025 e në vijim.
Të dhënat më të freskëta nga Autoriteti i Mbikëqyrjes Financiare (AMF) tregojnë se pavarësisht që primet nga sigurimi i detyrueshëm i makinave me MTPL të brendshme janë rritur me 7%, primi mesatar është ulur me 2.5%. Sipas AMF, kjo ulje vlerësohet të jetë kryesisht rezultat i fillimit të zbatimit të faktorit të riskut “Historiku i dëmeve”.
Rënia e primit mesatar nënkupton se bonus-malusi i skemës së re të sigurimit të makinave ka filluar të shfaqet, shoferët “e mirë”, pra ata që nuk kanë shkaktuar aksidente në 2025 po “shpërblehen” duke paguar më pak, ndërsa shoferët “e këqinj”, pra ata që kanë kryer aksidente gjatë vitit të kaluar po “ndëshkohen” duke paguar më shumë.
Sigurimi i detyrueshëm vijon të zërë mbi gjysmën e totalit të primeve të kompanive të sigurimit, ndërsa kontribut në rritjen e sigurimeve vullnetare dhanë klasat e përgjegjësive dhe ato të lidhura me sektorin detar.
Nga ana tjetër, primet e sigurimit të jetës u rritën po ashtu me 6%, kryesisht falë produktit të sigurimit të jetës së debitorit, kur vendoset kusht nga banka që kredimarrësi të sigurojë jetën.
Lidhur me pagesat e dëmeve, Autoriteti i Mbikëqyrjes Financiare (AMF) thekson se kompanitë e sigurimit kanë paguar kryesisht për dëmet e shkaktuara nga zjarri, forcat e natyrës dhe të tjera në pronë.
