Edi Rama u pa në publik të shtunën duke u ankuar se protestuesit e revolucionit të famingove kishin rënë viktimë e algoritm...
SPORT
Bajerni drejt titullit kampion, Nojer rikthehet më shpejt seç pritej
PiranjatPërditësimi i fundit 26 Shkurt 2026, 08:15
A mund të luaj Manuel Nojer kundër Borusia Dortmund pas gjithë kësaj? Shpresat u rritën të hënën, kur portieri u rikthye në stërvitje më herët se sa pritej. Manuel Nojer pësoi një çarje të fibrës muskulore në pulpë gjatë ndeshjes kundër Verder Bremen (3-0) pak më shumë se një javë më parë dhe mungoi jo vetëm në pjesën e dytë në Bremen, por edhe në ndeshjen e fundit në shtëpi të shtunën kundër Ajntraht Frankfurt, e cila u fitua 3-2.
Jonas Urbig ishte zëvendësuesi i tij në portë. Për shkak të këtij dëmtimi të portierit numër një të Bajernit, pjesëmarrja e tij në ndeshjen e madhe të së shtunës në mbrëmje kundër Borusia Dortmund ishte dhe mbetet në dyshim. Megjithatë, që nga e hëna ka shpresë të re se Nojer mund të luaj, pasi është rikthyer në stërvitje më herët nga sa ishte parashikuar fillimisht. Portieri zhvilloi disa ushtrime në fushë, siç njoftoi Bajerni. Seanca gjysmëorëshe nuk përfshinte ende ngarkesë të plotë, ishte stërvitja e tij e parë individuale që nga dëmtimi.
Megjithatë, ky ishte hapi i parë drejt një rikthimi të mundshëm këtë fundjavë. Stafi mjekësor i Bajernit do të vendos në ditët në vijim nëse portieri është gati për një rikthim të plotë. Kapiteni i Bajernit ka zhvilluar 18 paraqitje në Bundesliga këtë sezon, duke mbajtur pesë herë portën të paprekur dhe gjithashtu arriti ta mbante portën e paprekur në një pjesë loje në Bremen.
Në Ligën e Kampionëve, ai ka luajtur shtatë ndeshje, duke pësuar tetë gola (dy herë pa pësuar gol). Ndeshja mes Dortmundit dhe Bajernit gjithmonë mbart një tension të veçantë. Megjithatë, pas barazimit 2- 2 të Dortmundit në Lajpcig të shtunën në mbrëmje, tensioni është zbutur disi. Bajerni është shkëputur sërish me tetë pikë dhe është në rrugë të mirë për të siguruar një tjetër titull kampion të Gjermanisë. Për Borusia Dortmundin, sigurisht, vetëm fitorja do t’i mbaj gjallë shpresat e pakta për titullin.
Rekordi i tyre në shtëpi në Bundesliga u jep arsye për optimizëm për të shtunën, pasi ata nuk kanë pësuar asnjë humbje në njëmbëdhjetë ndeshjet e zhvilluara në shtëpi, me nëntë fitore dhe dy barazime. Të shtunën në mbrëmje do të shihet nëse kapiteni i Bajernit do të jetë gati për ‘Der Klasiker’ apo nëse do të duhet të pres edhe pak për rikthimin e tij.
