Analisti Endri Tafani, i ftuar në emisionin “Kafe Shqeto” në Syri TV, ka kritikuar kryeministrin Edi Rama, duke e cilësuar atë...
SPORT
Dinamo “fair play”, ekipi me më pak kartonë. Blutë janë skuadra që ndëshkohen më pak në Superiore
PiranjatPërditësimi i fundit 27 Shkurt 2026, 10:31
Dinamo e dy sezoneve të fundit, ka ndryshuar fytyrë nëse e krahasojmë me Dinamon e disa sezoneve radhazi, kur u kthye në një skuadër modeste të Kategorisë së Parë.
Investimet dhe trofetë e fituar sezonin e fundit, e kanë bërë Dinamon një nga skuadrat pretendente për të fituar titullin kampion, por njëkohësisht edhe një skuadër potente që mund të synojë edhe grupet e Europës. Sezonin e shkuar, blutë ishin të pafat me shortin ku iu desh të përballej me gjigandë të futbollit, si Hajduk Split apo Jagellonia. Nëse të parët arriti t’i eliminonin, me polakët ishte gjithçka e vështirë. Trajneri Ilir Daja ka sjellë në skuadër një frymë tjetër, të një skuadre që lufton deri në fund duke e rikthyer ekipin te trofetë që në sezonin e tij të parë pasi arriti të fitonte Kupën. Veç skuadrës kërkuese, Daja ka të drejtë kur thotë se Dinamo nuk është një ekip agresiv dhe se gjyqtarët shpesh herë e kanë ndëshkuar ndoshta edhe pa të drejtë. Në një vëzhgim të bërë nga “Panorama Sport”, vihet re se Dinamo është skuadra më “Fair Play” në kampionatin shqiptar si sezonin e shkuar, ashtu edhe këtë sezon.
SEZONI AKTUAL– Renditja “Fair Play” në Superiore për dy sezonet e fundit nxjerr në pah se Dinamo ka qenë skuadra me bilancin më të mirë disiplinor. Pas vendit të parë në sezonin 2024/ 25, blutë kryesojnë edhe në 2025/26. Megjithatë, një lexim i detajuar i statistikave tregon se statistikat e ekipit kryeqytetas kanë ndryshuar ndjeshëm nga një sezon në tjetrin. Në sezonin aktual 2025/26, Dinamo kryeson renditjen “Fair Play” me 59 pikë, duke regjistruar 33 kartonë të verdhë, 2 përjashtime me karton të dytë të verdhë dhe 4 kartonë të kuq direkt, pra 6 të kuq në total. Numri i kartonëve të verdhë është ndjeshëm më i ulëti në kampionat dhe krijon një diferencë të konsiderueshme me ekipet e tjera.
Për krahasim, Tirana ka 54 kartonë të verdhë, Flamurtari 61, Partizani 67, ndërsa Vllaznia arrin në 81, por këta të fundit kryesojnë kampionatin këtë sezon. Kampionët e Egnatias kanë 64 kartonë të verdhë, pothuajse dyfishin e Dinamos. Megjithatë, analiza bëhet më e balancuar kur përfshihen kartonët e kuq. Në sezonin 2025/26 Dinamo ka 6 të kuq në total, një shifër më e lartë se Tirana dhe Flamurtari, që kanë nga 1, por më e ulët se Egnatia, e cila ka 8. Kjo tregon se, ndonëse Dinamo kryeson për korrektësi në aspektin e kartonëve të verdhë, ka pasur episode të ndëshkuara më rëndë, që ndikojnë drejtpërdrejt në ecurinë e ndeshjeve. Këto statistika tregojnë se për të pretenduar titullin kampion në Shqipëri, nuk mjafton të jesh një skuadër “Fair Play”, por duhet një qasje më agresive dhe për të mos lejuar kundërshtarin të shprehë lojën e saj në fushë, pasi mund të ndëshkohesh siç ka bërë Dinamo.
SEZONI 2024/2025- Krahasimi me sezonin 2024/25 nxjerr në pah një ndryshim të madh nga ky sezon, edhe pse ka edhe shumë javë për t’u luajtur deri në fund të kampionatit. Një vit më parë, Dinamo kishte 55 kartonë të verdhë dhe vetëm 3 kartonë të kuq në total (1 direkt dhe 2 nga dy të verdhë), duke grumbulluar 66 pikë në renditjen “Fair Play”. Ulja nga 55 në 33 kartonë të verdhë në sezonin aktual përfaqëson një përmirësim të ndjeshëm në menaxhimin e faulleve të zakonshme. Në të njëjtën kohë, dyfishimi i kartonëve të kuq nga 3 në 6 tregon se ndëshkimet janë zhvendosur nga faulle të shpeshta, por më të lehta, drejt episodeve më të rënda dhe më vendimtare edhe pse shpesh herë ka pasur reagime publike dhe zyrtare kundër gjykimit, duke hedhur poshtë në një farë mënyre ndëshkimet e marra, sidomos ato me të kuq. Në kontekstin e agresivitetit të kampionatit, krahasimi me Egnatian është domethënës.
Skuadra kampione e cila natyrisht është skuadër që duhet marrë shembull, ka një numër dukshëm më të lartë kartonësh, si të verdhë ashtu edhe të kuq, çka sugjeron një stil loje më fizik dhe agresiv. Dinamo, në të kundërt, paraqet një skuadër më të brishtë dhe pa shumë agresivitet në fushën e blertë, gjë e cila nuk e ndihmon dhe këtë e dëshmon titulli kampion i Egnatias që tregon se agresiviteti mbetet një faktor me peshë në garën për kreun. Statistikat tregojnë një skuadër më të kujdesshme në ndërhyrje të zakonshme, por që ka paguar më shtrenjtë në disa episode specifike, në një kampionat ku diferenca mes disiplinës dhe agresivitetit shpesh përcakton është vendimtare.
