Ditën e nesërme janë paralajmëruar dy protesta të njëpasnjëshme, në Zvërnec dhe në Tirana, me qytetarët...
SPORT
Distria Krasniqi shkëlqen në Ditën e Flamurit me medalje bronzi në Abu-Dabi
PiranjatPërditësimi i fundit 28 Nëntor 2025, 22:17
Distria Krasniqi ka shkëlqyer në Abu Dhabi Grand Slam 2025 duke fituar medaljen e bronztë për Kosovën në një ditë simbolike si Dita e Flamurit.
Xhudistja kosovare e nisi garën e lirë në xhiron e parë, ndërsa në të dytën mposhti me Yuko rusen Karina Efimova. Ajo vazhdoi me një tjetër paraqitje të fortë në çerekfinale, duke e mundur me Wazaari judisten izraelite Gefen Primo.
Në gjysmëfinale u ndal nga hungarezja Reka Pupp, e cila fitoi me Yuko, por kjo nuk e ndali Krasniqin që në duelin për medaljen e bronztë dominoi bindshëm kundër Naomi Van Krevel nga Holanda duke fituar me tre Yuko.
Një medalje bronzi e merituar dhe e zjarrtë, që vjen si dhuratë perfekte në Ditën e Flamurit, duke e vazhduar traditën e suksesit të sportistes së jashtëzakonshme kosovare.
Trajneri i përfaqësueses së Kosovës, Driton Kuka ka reaguar në Facebook pas suksesit më të fundit të Distria Krasniqit në Grand Slam Abu Dhabi, duke e quajtur këtë rezultat një dhuratë të veçantë në ditën e 28 Nëntorit.
Ai theksoi se gjatë vitit 2025, Krasniqi ka fituar medalje në të gjitha garat ku ka marrë pjesë, duke nisur nga Grand Slami i Parisit e deri te medalja e sotme në Abu-Dabi.
Kuka kujtoi se medaljet më të çmuara të vitit për Ditrinë mbeten titulli i kampiones së Evropës dhe nënkampiones së botës në Budapest, duke e përshkruar vitin 2025 si vit të medaljeve për sportisten, për të si trajner, për Federatën e Xhudos dhe për gjithë sportin e Kosovës e kombin shqiptar.
Ai shtoi se Krasniqi po ecën e sigurt drejt Lojërave Olimpike LA 2028, duke mbetur pjesë e top dhjetëshes botërore, ndërsa medalja e radhës vjen pikërisht në ditën e Flamurit nga sporti që ka sjellë pesë medalje olimpike për vendin.
