Një 23-vjeçar në Korçë, i cili duhej të qëndronte në arrest shtëpie, është kapur nga policia pas di...
SPORT
Hija e Calciopolit rikthehet në Itali, avokati italian shpjegon çështjen e arbitrave
PiranjatPërditësimi i fundit 7 Maj 2026, 14:30
Debati në futbollin italian vijon të mbetet i nxehtë, teksa hetimet mbi dosjen e arbitrimit po thellohen dhe po rikthejnë në vëmendje skandalin e famshëm Calciopoli.
Avokati italian D’Onofrio, i cili në të kaluarën ka punuar pranë Luciano Moggi gjatë atij skandali, deklaroi se hetimet aktuale janë ende në fazë fillestare. Sipas tij, të dhënat e deritanishme nuk janë të mjaftueshme për të përcaktuar nëse bëhet fjalë për shkelje procedurale apo për krime sportive të qëllimshme që synojnë ndikimin e rezultateve të ndeshjeve.
Ai theksoi se për çdo dënim sportiv është e domosdoshme të provohet “qëllimi i qartë” për manipulimin e rezultateve, por paralajmëroi se precedenti i vitit 2006 e bën çështjen jashtëzakonisht delikate.
“Standardet e vendosura nga Calciopoli për vlerësimin e provave janë shumë të rrepta dhe krahasimet me atë periudhë janë të pashmangshme”, u shpreh ai.
D’Onofrio shtoi gjithashtu se mungesa e klubeve në listën aktuale të të pandehurve nuk përjashton mundësinë e ekzistencës së “mashtrimit sportiv”. Sipas tij, ligji sportiv italian lejon që një klub të konsiderohet përgjegjës në mënyrë indirekte nëse provohet se ka përfituar nga shkeljet, edhe pa një përfshirje të drejtpërdrejtë të drejtuesve.
Në përfundim, avokati theksoi se neni 6 i rregullores së Federatës Italiane të Futbollit u jep autoriteteve sportive kompetenca të gjera për të ndëshkuar klubet që përfitojnë nga parregullsitë në arbitrim apo në aspektin sportiv. Një situatë që rikthen kujtimet e sanksioneve të rënda të vendosura gjatë “Calciopoli”-t, kur disa klube, veçanërisht Juventus, u përballën me ndëshkime historike që tronditën futbollin italian.
