Izraelitët po përgatiten të votojnë në zgjedhje që konsiderohen ndër më të rëndësishmet në histori...
SPORT
Kartonët penalizojnë Bytyçin e Ismailin te Partizani, Kërnaja ka gati zëvendësuesit
PiranjatPërditësimi i fundit 24 Prill 2026, 14:10
Partizani përgatitet për derbin e kryeqytetit ndaj Tiranës me disa probleme të rëndësishme në formacion, teksa të kuqtë do të zbresin në fushë me mungesa të detyruara në një nga ndeshjet më vendimtare të sezonit. Sfida që do të luhet të shtunën në stadiumin “Air Albania”, duke nisur nga ora 19:00, pritet të ketë një ndikim të drejtpërdrejtë në objektivat e skuadrës për “Final Four”. Trajneri Oltijon Kërnaja nuk do të ketë në dispozicion dy titullarë të rëndësishëm si Altin Bytyçi dhe Redon Ismaili. Të dy lojtarët janë të pezulluar për këtë përballje, duke i dhënë një goditje jo të vogël balancave të skuadrës në prag të derbit.
Bytyçi plotësoi numrin e kartonëve të verdhë dhe do të jetë i detyruar ta ndjekë këtë sfidë nga tribuna, ndërsa Ismaili u ndëshkua me karton të kuq në ndeshjen e fundit, duke lënë bosh një rol kyç në mesfushën e Partizanit. Mungesa e tyre detyron stafin teknik të bëjë lëvizje të rëndësishme në formacion. Në repartin e mbrojtjes, një nga alternativat kryesore për të zëvendësuar Bytyçin është Janjeva, i cili pritet të marrë një rol titullari në këtë sfidë delikate.
Një tjetër opsion është edhe Preka, i cili është rikthyer me skuadrën pas një periudhe të gjatë mungese. Megjithatë, në rastin e Prekës mbetet për t’u parë gjendja fizike, pasi lojtari nuk ka pasur vazhdimësi dhe mund të mos jetë në formën optimale për të përballuar një ndeshje me intensitet të lartë si derbi. Në mesfushë, situata paraqitet disi më fleksibile për trajnerin Kërnaja. Mungesa e Ismailit hap disa skenarë për mënyrën se si do të ndërtohet loja në qendër të fushës. Një nga alternativat më të mundshme është aktivizimi i Kamer Qakës në rolin e regjisorit, një lojtar me eksperiencë që mund të japë qetësi dhe organizim në fazën e ndërtimit të aksioneve.
Po ashtu, një tjetër opsion është edhe Valentino Murataj, i cili është i gatshëm dhe mund të ofrojë energji dhe dinamizëm në mesin e fushës, duke qenë një alternativë e besueshme për këtë përballje. Ndërkohë, dy lojtarët që duken të sigurt në mesfushë janë Hjumën dhe Dumbia, të cilët pritet të jenë pika referimi në këtë repart dhe të mbajnë peshën kryesore të lojës së skuadrës. Këto ndryshime të detyruara mund të ndikojnë në mënyrën e lojës së Partizanit, por njëkohësisht i japin mundësi disa lojtarëve të tjerë për të treguar vlerat e tyre në një ndeshje me peshë të madhe.
Derbi ndaj Tiranës vjen në një moment jo të lehtë për të kuqtë, të cilët nuk kanë arritur të fitojnë në pesë ndeshjet e fundit, megjithatë një sfidë e tillë mbetet gjithmonë një mundësi e mirë për reagim. Përballë një rivali që lufton për mbijetesë, Partizani do të kërkojë të bëjë maksimumin, pavarësisht mungesave, për të marrë një rezultat pozitiv dhe për të mbajtur gjallë objektivat e sezonit. Në fund, mbetet për t’u parë se cilat do të jenë zgjedhjet përfundimtare të trajnerit Kërnaja dhe si do të përgjigjet skuadra në fushë në një ndeshje që pritet të jetë e luftuar në çdo detaj.
