Me indicien se Kristjan Sterjo mund të fshihet te varrezat e Korçës, forcat RENEA kanë zbarkuar pikërisht aty për të kontro...
SPORT
Milan pëson humbje të thellë në miqësoren ndaj Chelsea-t
PiranjatPërditësimi i fundit 8 Gusht 2026, 18:48
Pas barazimeve ndaj Celtic dhe Interit, Milani i Ruben Amorimit ka pësuar humbjen e parë në fazën përgatitore. Kuqezinjtë u mposhtën 3-0 nga Chelsea, në një ndeshje ku skuadra angleze goditi edhe tre herë shtyllën.
Protagonisti kryesor i sfidës ishte Joao Pedro, i cili realizoi një dopietë, ndërsa golin tjetër për londinezët e shënoi mesfushori Moisés Caicedo. Chelsea e nisi më mirë takimin dhe krijoi rastin e parë të rrezikshëm pas 12 minutash lojë. Torriani reagoi mirë në dalje, duke ndalur tentativën e João Pedros.
Katër minuta më vonë, londinezët iu afruan sërish golit. Palestra shërbeu Welbeck, i cili goditi shtyllën e jashtme. Milani u përpoq të reagonte me kalimin e minutave, por kuqezinjtë nuk arritën të krijonin rrezik serioz për portën e mbrojtur nga Sanchez.
Goli i parë erdhi në shtesën e pjesës së parë. Caicedo ekzekutoi një goditje nga këndi, mbrojtja e Milanit mbeti pasive dhe në shtyllën e dytë João Pedro fitoi duelin me De Winter, duke mposhtur Torrianin.
Pjesa e dytë nisi në mënyrën më të keqe të mundshme për Milanin. Vetëm një minutë pas rifillimit të lojës, Pedro Neto dërgoi një tjetër krosim në zonë, ku João Pedro përfitoi nga pasiguria e mbrojtjes kuqezi dhe realizoi me një goditje nga afër.
Chelsea nuk u ndal dhe vetëm katër minuta më vonë shënoi edhe golin e tretë. Një skemë e ekzekutuar nga goditja e këndit nxori në pozicion për gjuajtje Caicedon në hyrje të zonës. Mesfushori ekuadorian u koordinua mjaft mirë në ajër dhe e dërgoi topin në cepin e poshtëm të portës, duke e çuar rezultatin në 3-0.
Skuadra e Xabi Alonsos pati mundësi edhe për të shënuar golin e katërt. Në minutën e 75-të, Quenda goditi shtyllën e jashtme, ndërsa pak më vonë të njëjtin fat pati edhe tentativa e Nicolas Jackson.
Në fund, Torriani shpëtoi Milanin nga një tjetër gol, duke bërë një ndërhyrje të shkëlqyer ndaj Estevãos në minutën e 87-të. Chelsea merr kështu një fitore të pastër 3-0, ndërsa Milani i Amorimit regjistron humbjen e parë në këtë fazë përgatitore. Kuqezinjtë do të rikthehen në fushë më 15 gusht, kur do të përballen me Manchester United.
