Bordi i Transparencës ka njoftuar se çmimi i shitjes me pakicë i nënproduktit gazoil i standardit SSH EN 590 të jetë jo më...
SPORT
Përplasja mes ultrasve, dënohen me ndeshje pa tifozë dhe gjobë Elbasani dhe Tirana
PiranjatPërditësimi i fundit 12 Maj 2026, 12:55
Komisioni i Disiplinës pranë Federatës Shqiptare të Futbollit ka publikuar vendimet pas incidenteve dhe dhunës së regjistruar në stadiumin “Elbasan Arena”.
Si Elbasani ashtu edhe Tirana janë ndëshkuar me gjoba dhe me nga dy ndeshje pa tifozë në stadiumet respektive.
AF Elbasani u dënua me 500 mijë lekë gjobë për mosgarantim të rendit dhe sigurisë gjatë ndeshjes, lejim të hyrjes së personave të paautorizuar në fushë, si edhe për hedhje sendesh dhe rrezikim të sigurisë së lojtarëve dhe zyrtarëve të takimit. Klubi do të luajë gjithashtu dy ndeshje pa praninë e tifozëve, masë që do të nisë të zbatohet në sezonin 2026–2027.
Ndërkohë, KF Tirana është dënuar me 300 mijë lekë gjobë për hyrje të tifozëve në fushë, hedhje sendesh dhe sjellje që rrezikuan sigurinë në stadium. Edhe bardheblutë do të zhvillojnë dy ndeshje pa spektatorë.
Vendime disiplinore pati edhe për klube e zyrtarë të tjerë. KF Sopoti u gjobit me 300 mijë lekë për hedhje sendesh dhe kore fyese nga tifozët, ndërsa zyrtari i Bylisit, Arbër Sino, u pezullua me katër ndeshje për sjellje josportive ndaj arbitrave.
Komisioni njoftoi gjithashtu hapjen e hetimit disiplinor për incidentet në ndeshjen Partizani U-18 – Tirana U-18, ndërsa rrëzoi si të pabazuar kërkesën e Kukësit për aktivizim të parregullt lojtarësh nga kundërshtari.
