Allison Guerriero, ish-e dashura e Charles McGonigal, ish-drejtorit të zyrës së kundërzbulimit të FBI-së në Nju Jork, e cila ...
SPORT
Platini ‘sulmon’ Infantinon: E dija që e kishte mendjen te paratë dhe pushteti, duhet të largohet!
PiranjatPërditësimi i fundit 31 Gusht 2026, 13:12
Michel Platini ka rikthyer në qendër të vëmendjes përplasjen me presidentin e FIFA-s, Gianni Infantino, duke e akuzuar për etje për pushtet dhe duke kërkuar largimin e tij nga drejtimi i futbollit botëror.
Gjatë një interviste për emisionin “Canal Football Club”, ish-presidenti i UEFA-s dhe legjenda e futbollit francez, Michel Platini, ka kritikuar ashpër Gianni Infantinon dhe drejtuesit aktualë të futbollit ndërkombëtar.
Platini, i cili ka punuar ngushtë me Infantinon gjatë viteve 2007-2015, kur francezi drejtonte UEFA-n dhe italiani-zviceran ishte sekretar i përgjithshëm, tha se prej kohësh kishte vënë re ambicien e Infantinos për pushtet dhe para.
“Gjithmonë e kam ditur që i pëlqenin shumë paratë dhe pushteti”, deklaroi Platini, duke shtuar se në atë kohë Infantino kishte ende një epror mbi vete.
Fituesi i tre Topave të Artë kritikoi gjithashtu mënyrën se si drejtohet sot futbolli botëror, duke argumentuar se vëmendja duhet të jetë te lojtarët dhe jo te drejtuesit.
“Futbolli është një festë e mrekullueshme dhe ndeshjet janë ato që kanë rëndësi. Pjesa tjetër është politikë, një mikrokozmos njerëzish që mendojnë se janë bosët e futbollit”, u shpreh ai.
Platini përmendi emra si Kylian Mbappé, Zinedine Zidane dhe Diego Maradona si “shefat e vërtetë” të futbollit, ndërsa drejtuesit institucionalë i cilësoi si “burokratë që arrijnë në një pozicion, shijojnë lavdinë dhe paratë”.
Përplasja mes Platinisë dhe Infantinos tashmë është zhvendosur edhe në fushën ligjore. Ish-kapiteni i Francës ka ngritur një padi ndaj kreut të FIFA-s, duke e akuzuar për disa shkelje, ndërsa në të njëjtën kohë edhe institucionet e futbollit po përballen me hetime dhe procedura të ndryshme.
Platini beson se largimi i Infantinos nuk do të zgjidhet përmes politikës sportive, por përmes gjykatave.
“Nëse UEFA dëshiron ta rrëzojë Infantinon, kjo do të bëhet përmes gjykatave. Ai ka dështuar sepse duhej të ishte garantuesi i rregullave të lojës, por nuk i respektoi ato. Ai duhet të largohet!”, deklaroi Platini.
Pavarësisht kritikave, ish-numri 10 i Francës e bëri të qartë se nuk ka ndërmend të rikthehet në drejtimin e futbollit.
“Klubet apo organet drejtuese? Për mua kapitulli është i mbyllur”, përfundoi Platini.
