Policia është përplasur me protestuesit e rinj në qendër të Tiranës pasditen e të hënës, ku dhjetëra pers...
SPORT
Rabiot, i pakënaqur me veten dhe shokët: “Jam i zemëruar, nuk e di nëse e meritonim”
PiranjatPërditësimi i fundit 19 Tetor 2026, 09:10
Milani mori tri pikë të rëndësishme ndaj Atalantës, duke fituar 3-2, por Adrien Rabiot nuk e fshehu pakënaqësinë për mënyrën se si skuadra e menaxhoi ndeshjen. Mesfushori francez vlerësoi paraqitjen në pjesën e parë, por kritikoi rënien e përqendrimit pas pushimit, që i dha mundësi kundërshtarit të rikthehej në lojë.
“Luajtëm shumë mirë në pjesën e parë, por më pas, çuditërisht, humbëm fillin e lojës. Jam i zemëruar, sepse nëse luajmë kështu në pjesën e dytë, është e kotë të bëjmë një pjesë të parë të mirë. Për fat të mirë fituam, por nuk e di nëse e meritonim këtë fitore”, u shpreh Rabiot.
Francezi u ndal edhe te problemet që Milani po shfaq në momente të caktuara të ndeshjeve, duke përjashtuar lodhjen fizike si shkakun kryesor. Sipas tij, problemi lidhet më shumë me aspektin mendor dhe humbjen e përqendrimit kur skuadra krijon një avantazh të konsiderueshëm.
“Nuk është diçka fizike, por mendore. Ishim tre gola përpara dhe më pas ulëm përqendrimin. Kur përballesh me një ekip cilësor, rrezikon të barazohesh dhe madje të humbasësh ndeshjen”, theksoi mesfushori.
Rabiot kujtoi gjithashtu se kishte ngritur të njëjtën çështje edhe pas përballjes me Sassuolon, duke insistuar se skuadra duhet të punojë për të përmirësuar mentalitetin dhe qëndrueshmërinë gjatë gjithë 90 minutave.
Kritikat e tij u drejtuan edhe ndaj lojtarëve që aktivizohen gjatë ndeshjes, të cilët, sipas francezit, duhet të japin një kontribut më të madh për të ruajtur ritmin dhe ekuilibrin e skuadrës.
Pavarësisht pakënaqësisë, Rabiot pranoi rëndësinë e tri pikëve të marra ndaj Atalantës. Milani ia doli të ruante avantazhin deri në fund, por mesfushori dha një mesazh të qartë: për të synuar objektiva të rëndësishëm, kuqezinjtë duhet të shmangin rëniet e përqendrimit dhe të tregojnë më shumë vazhdimësi në lojë.
