Revolta kundër ndërtimeve në Zvërnec nuk është kufizuar vetëm brenda Shqipërisë. Dje dhe sot, shqiptarë që...
SPORT
Skandali në Serbi/ Federata kosovare kërkon ndëshkim të rreptë nga UEFA pas thirrjeve anti-Kosovë
PiranjatPërditësimi i fundit 12 Tetor 2025, 08:13
Federata e Futbollit e Kosovës (FFK) ka reaguar me tonë të forta pas skenave të shëmtuara të shfaqura gjatë ndeshjes Serbi – Shqipëri, ku në tribunat e stadiumit të Leskovcit u panë thirrje në kor kundër Kosovës dhe mesazhe provokuese me flamurin serb mbi hartën e Kosovës.
Në njoftimin zyrtar, FFK dënon ashpër këto veprime, duke theksuar se ato bien ndesh me frymën sportive dhe me parimet e respektit që promovojnë UEFA dhe FIFA.
Reagimi i plotë:
Federata e Futbollit e Kosovës dënon ashpër thirrjet në kor kundër Kosovës dhe mesazhet provokuese të shfaqura në tribunat e stadiumit të Leskovcit me flamurin serb mbi hartën e Kosovës gjatë ndeshjes ndërmjet Serbisë dhe Shqipërisë.
Këto skena për fat të keq nuk janë të reja në stadiumet serbe, ku nxitja e urrejtjes dhe mesazhet fyese ndaj shteteve fqinje vazhdojnë të përsëriten pa ndëshkim të mjaftueshëm. FFK vlerëson se veprime të tilla bien ndesh me frymën sportive, me parimet e respektit dhe me vlerat që UEFA dhe FIFA përfaqësojnë.
Në këtë drejtim, FFK do të paraqesë një notë proteste në UEFA, duke kërkuar që të ndërmerren masa të qarta dhe të rrepta ndaj Federatës së Futbollit të Serbisë për këto akte të përsëritura, që dëmtojnë imazhin e futbollit dhe cenojnë parimet e UEFA-s dhe FIFA-s.
Njëkohësisht, Federata e Futbollit e Kosovës uron Kombëtaren e Shqipërisë për fitoren e merituar 1:0 ndaj Serbisë, një fitore që pasqyron karakterin, përkushtimin dhe forcën e futbollit shqiptar.
Federata e Futbollit e Kosovës do të vazhdojë të mbrojë me dinjitet vlerat e sportit, të respektit dhe të barazisë mes popujve, duke kërkuar që çdo fushë futbolli në Evropë të jetë vend i lojës dhe jo i urrejtjes.
