Kryetari i Partisë Demokratike, Sali Berisha, ka folur për mediat para Kuvendit, ku ka kundërshtuar mënyrën se si, sipas tij, po proc...
SOCIALE
Rikthim pas 5 vitesh në Hollivud, Johnny Depp përlotet në tapetin e kuq të Festivalit të Filmit në Kanë (FOTO)
PiranjatPërditësimi i fundit 17 Maj 2023, 13:29
FRANCË- Pas 5 vitesh mungesë dhe një aventure të madhe ligjore me ish-bashkëshorten e tij, Amber Heard, ylli i Hollivudit Johnny Depp u shfaq në Palais des Festival në Kanë (Francë), i shoqëruar nga kasti i filmit "Jeanne du Barry".
Pritja e Johnny Depp në tapetin e kuq u bë virale. Fansat francezë të aktorit filluan të mblidhen që në orën 10 të mëngjesit përgjatë Croisette, një rrugë e famshme në Kanë, me shpresën për të marrë një autograf dhe për të bërë një foto me Depp. Fansat e emocionuar mbanin pankarta ku shkruhej "Bravo Johnny" dhe "Ne e duam Johnny", ndërsa të tjerët brohoritën emrin e tij, raporton “Protothema”.
Depp u shfaq me flokët e kapur dhe syze dielli, duke marrë kohë për të pozuar për selfie dhe për të biseduar me fansat që erdhën për ta parë. Filmi “Jeanne du Barry” tregon historinë e marrëdhënies së turbullt midis mbretit francez Louis XV dhe dashnores së tij, Madame Jeanne du Barry.
Për 7 minuta fansat brohoritën për të gjatë Festivalit të Filmit në Kanë, të martën. Aktori i mirënjohur, 59-vjeç, i cili luan Mbretin Louis XV u përlot ndërsa pozonte me regjisorin.
Filmi “Jeanne du Barry” është projekti i parë i Depp-it që kur ai mori një goditje të fortë nga Hollivudi, pas akuzave për abuzim ndaj ish-bashkëshortes së tij, Amber Heard në vitin 2016, raporton "DailyMail".
Por pas një gjyqi gjashtë-javor vitin e kaluar, u përcaktua se Heard kishte shpifur ndaj ish-bashkëshortit të saj dhe ajo u urdhërua t'i paguante atij mbi 8 milion dollarë dëmshpërblim, megjithëse më vonë ata ranë dakord për 1 milion dollarë për t'i dhënë fund betejës së tyre. Festivali i 76-të i Filmit shënoi gjithashtu paraqitjen e parë të Depp në tapetin e kuq që nga fitorja e tij në gjykatë.
Depp nuk mund ta fshihte kënaqësinë e tij për rikthimin në Hollivud, pasi më parë u hoq nga disa projekte gjatë gjykimit, duke përfshirë ekskluzivitetin e filmit "Fantastic Beasts".
“Jeanne du Barry” është cilësuar si rikthimi i Depp - megjithëse prania e tij në Kanë është debatuar ashpër.
Pavarësisht se fituan ovacione të fortë, kritikët kishin reagime të ndryshme ndaj performancës së Depp dhe vetë filmit.
Disa ishin të impresionuar nga fjala e tij e folur në frëngjisht, ndërsa të tjerë thanë se ishte "e mrekullueshme të shihje Depp-in në një gjendje delikate dhe të qetë". /Dosja.al
