Kreu i Partisë Demokratike, Sali Berisha, në një dalje për mediat pas mbledhjes së grupit parlamentar demokrat, ka sulmuar qeverin&eu...
AKTUALITET
AKEP miraton planin për uljen e tarifave të terminimit në rrjetet fikse duke nisur nga viti i ardhshëm
PiranjatPërditësimi i fundit 5 Nëntor 2025, 12:20
Autoriteti i Komunikimeve Elektronike dhe Postare (AKEP) ka miratuar dokumentin përfundimtar të analizës së tregjeve të telefonisë fikse në Shqipëri, që përfshin tregjet me shumicë të terminimit dhe tranzitimit të thirrjeve në rrjetet publike telefonike nga vendndodhje fikse. Analiza, e miratuar me vendim të Këshillit Drejtues nr. 19, datë 3 nëntor 2025, përbën një ndër aktet më të rëndësishme të kuadrit të ri ligjor në fushën e komunikimeve elektronike, në zbatim të ligjit nr. 54/2024 “Për Komunikimet Elektronike”.
Rregullim i ri për tarifat e terminimit
Sipas AKEP, tarifat e terminimit të thirrjeve në rrjetet fikse (FTR) do të ulen ndjeshëm në mënyrë graduale, duke arritur një reduktim prej 57% deri në vitin 2027. Për operatorin One Albania dhe operatorët alternativë të rrjeteve fikse, tarifa aktuale prej 0.7 lekë/minutë (pa TVSH) do të ulet në: 0.3 lekë më 1 mars 2026, 0.15 lekë më 1 shtator 2026, 0.07 lekë më 1 mars 2027.
AKEP thekson se kjo ulje bazohet në praktikat e BEREC dhe të Komisionit Evropian, duke përdorur metodologjinë “benchmark” të vendeve të BE-së dhe rajonit, pasi përdorimi i modelit të kostos “Bottom-Up LRIC” nuk do të ishte i justifikueshëm në një treg me normë të ulët penetrimi të telefonisë fikse dhe me përdorim gjithnjë në rënie.
Kush ka fuqi të ndjeshme në treg (FNT)
Nga analiza, One Albania vlerësohet si operator me Fuqi të Ndjeshme në Treg (FNT) për terminimin e thirrjeve në rrjetin e vet fiks. Po ashtu, operatorët alternativë të rrjeteve fikse, si pjesë e rregullimit, mbeten subjekt i detyrimeve për transparencë, mosdiskriminim, akses në elementet e rrjetit dhe tarifim të rregulluar për terminim.
Në anën tjetër, AKEP ka vendosur heqjen e rregullimit për tregun e tranzitimit të thirrjeve fikse, duke e de-rregulluar këtë segment pas testit të tre kritereve që vërtetoi ekzistencën e konkurrencës efektive. Kjo nënkupton se detyrimet rregullatore që kishin qenë në fuqi për ish-Albtelecom do të hiqen gradualisht, sipas vendimit të Këshillit Drejtues.
Ndryshimet strukturore dhe konsolidimi i tregut
Në periudhën 2020–2024, tregu i komunikimeve fikse në Shqipëri ka pësuar ndryshime të thella strukturore, si rezultat i konsolidimeve dhe përqendrimeve të mëdha. Kështu, Vodafone Albania përfitoi kontrollin e ABCom dhe vepron sot edhe në tregun e rrjeteve fikse, ndërsa 4iG Nyrt. bleu Albtelecom dhe One Telecommunications, të cilat sot operojnë të bashkuar nën emrin One Albania. Të dy operatorët, Vodafone dhe One Albania, ofrojnë tashmë shërbime të kombinuara fikse dhe mobile, duke u bërë konkurrentët kryesorë edhe në tregun e broadband-it fiks.
AKEP e konsideron këtë konsolidim si një zhvillim strukturor të rëndësishëm që ka ndryshuar ndjeshëm balancat konkurruese në treg, duke kërkuar rregullim të ri për ruajtjen e konkurrencës së qëndrueshme dhe mbrojtjen e konsumatorit.
Konteksti i ri ligjor dhe europian
Analiza e AKEP bazohet në Kodit Europian të Komunikimeve Elektronike (Direktiva 2018/1972/BE) dhe Rregulloren (EU) 2021/654, që përcaktojnë harmonizimin e tarifave të terminimit në të gjithë BE-në. Shqipëria, në proces të përafrimit me këtë kuadër, aplikon standardet e reja të transparencës, konkurrencës dhe rregullimit të drejtë të tregjeve elektronike.
AKEP thekson se qëllimi i këtij procesi është promovimi i konkurrencës së qëndrueshme, eficienca e rrjeteve fikse dhe ofrimi i shërbimeve me cilësi dhe çmime të përballueshme për përdoruesit fundorë, përfshirë grupet me nevoja të veçanta.
Me këtë vendim, AKEP përmbyll një proces të gjerë konsultimi publik 45-ditor, ku morën pjesë operatorët kryesorë dhe Autoriteti i Konkurrencës. Dokumenti final përcakton një kuadër të ri rregullator që reflekton realitetin e ri të tregut të konvergjencës fikse dhe mobile në Shqipëri dhe përafron vendin me standardet europiane të rregullimit të komunikimeve elektronike.
