Shqiptarët paguajnë për karburant, makina, banka dhe prona, por kur vjen puna te sigurimi i jetës, shëndetit apo pensioni privat, kul...
AKTUALITET
25-vjetori i bashkëpunimi mes FA dhe Gardës së New Jersey, Begaj: Miqësi që i ka rezistuar kohës
PiranjatPërditësimi i fundit 6 Maj 2026, 15:28
Presidenti i Republikës, Bajram Begaj, mori pjesë në kremtimin e 25-vjetorit të bashkëpunimit midis Forcave të Armatosura dhe Gardën Kombëtare të New Jersey-t. Në këtë ceremoni, të zhvilluar në Komandën e Forcës Tokësore në Zallherr, krahas autoriteteve të larta të mbrojtjes dhe përfaqësuesve të institucioneve shqiptare, ishin të pranishëm dhe përfaqësuesja e Gardës Kombëtare të New Jersey-it, Gjenerale Yvonne Mays, si dhe zonja Nancy VanHorn, e Ngarkuara me Punë e Shteteve të Bashkuara të Amerikës në Shqipëri. Në fjalën përshëndetëse, Presidenti i Republikës e cilësoi këtë përvjetor si akt nderimi për partneritetin Shqipëri-SHBA që ka prodhuar besim, profesionalizëm, siguri, dhe, mbi të gjitha, lidhje njerëzore midis ushtarakëve, institucioneve dhe dy popujve. “Për Shqipërinë, partneriteti strategjik me Shtetet e Bashkuara të Amerikës është një nga gurët themelorë të politikës sonë të jashtme, të sigurisë dhe të mbrojtjes”, – deklaroi Presidenti Begaj në fjalën përshëndetëse, duke theksuar se bashkëpunimi me Gardën Kombëtare të New Jersey-it, përbën një nga historitë më të suksesshme të bashkëpunimit ushtarak dhe strategjik Shqipëri-SHBA, pasi për 25 vite ka ndihmuar në transformimin, modernizimin dhe forcimin e Forcave të Armatosura.
“Ka qenë një marrëdhënie besimi, profesionalizmi dhe solidariteti. Përmes trajnimeve, edukimit ushtarak, mbështetjes teknike, stërvitjeve të përbashkëta dhe angazhimeve operacionale, ky partneritet ka ndihmuar që Forcat tona të Armatosura të afrohen gjithnjë e më shumë me standardet më të mira të NATO-s. Sot, Forcat e Armatosura të Shqipërisë janë më profesionale, më të ndërveprueshme dhe më të përgatitura për të përmbushur detyrimet e tyre kombëtare dhe aleate”, – u shpreh Presidenti i Republikës në cilësinë e Komandantit të Përgjithshëm të Forcave të Armatosura.
Gjatë fjalës vërejti se ka ende potencial për të zgjeruar këtë bashkëpunim dhe se ai duhet të marrë dimensione të reja, si në arsimin ushtarak, stërvitjet e përbashkëta, në mbrojtjen kibernetike, edhe në zhvillimin e infrastrukturës strategjike.
Në këtë kontekst, Presidenti Begaj theksoi: “Shqipëria ka shumë për të ofruar dhe shumë për të ndërtuar së bashku me partnerët e saj amerikanë. Infrastruktura strategjike, kapacitetet mbrojtëse, Baza Ajrore Taktike e Kuçovës, porti i Porto Romanos, projektet në fushën e transportit dhe korridoret rajonale të lidhjes janë pjesë e një vizioni më të gjerë: një vizioni të një Shqipërie më të fortë, më të sigurt dhe më të dobishme për Aleancën”. Për sa i përket situatës në rajonin tonë dhe sfidave të kohës, Presidenti Begaj theksoi nevojën për forcim të mëtejshëm të NATO-s, anëtarësim të Kosovës në këtë organizëm dhe prezencën e domosdoshme të SHBA-së në rajon.
“Në këtë kohë krizash dhe pasigurish, siguria është më parësore se kurrë. Për Shqipërinë, NATO duhet të mbetet e fortë, aktive dhe e bashkuar, ndërsa Shtetet e Bashkuara të Amerikës mbeten partneri ynë kryesor strategjik”, – deklaroi Presidenti i Republikës duke u shprehur se “sfida të përbashkëta kërkojnë përgjigje të përbashkëta”.
“Shqipëria e ka bërë zgjedhjen e saj strategjike. Ajo qëndron me Shtetet e Bashkuara, me NATO-n dhe me botën demokratike. Dhe nëse dikush kërkon të gjejë një vend pro-amerikan në rajonin tonë, do ta gjejë gjithmonë në Shqipëri, në Kosove dhe kudo ku ka shqiptarë. Ne ishim me Shtetet e Bashkuara të Amerikës në koalicionin antiterror, jemi edhe sot në nismën e Samitit për Paqen” – deklaroi Presidenti Begaj.
Kreu i Shtetit rikonfimoi mirënjohje për kontributin e Gardës Kombëtare të New Jersey-it dhe mbështetjen e tij për suksesin e mëtejshëm dhe forcimin e marrëdhënieve me Shtete e Bashkuara:
“Le të jetë ky 25-vjetor jo vetëm një kremtim i së shkuarës, por edhe një zotim për të ardhmen. Një zotim për më shumë bashkëpunim. Një zotim për më shumë siguri. Një zotim për një Aleancë edhe më të fortë mes Shqipërisë dhe Shteteve të Bashkuara të Amerikës. Gjenerale Mays, Faleminderit shumë që jeni sot këtu! Ne shqiptarët kemi një thënie: “Shtëpia e shqiptarit është e mikut dhe e Zotit”. Ju jeni në shtëpinë tuaj këtu. Ambasadore, faleminderit për gjithçka keni bërë!”, – u shpreh Presidenti i Republikës në mbyllje të fjalës përshëndetëse, ku përcolli dhe një mesazh drejtuar të rinjve përmes nxënësve të gjimnazit “Qemal Stafa”, të pranishëm në këtë ceremoni. “Të rinjtë, – theksoi Presidenti Begaj, – janë gjenerata që do të forcojë edhe më shumë miqësinë shqiptaro-amerikane dhe janë e ardhmja e këtij partneriteti strategjik.
