Kryeministri Edi Rama ka vijuar sulmet ndaj protestuesve që prej javësh janë mbledhur në Tiranë kundër qeverisë së tij...
AKTUALITET
‘Afrika Perëndimore, një korridor i ri kriminal’/ Softa: Mafia shqiptare ka peshë dhe fuqi
PiranjatPërditësimi i fundit 24 Shkurt 2026, 09:47
Grupet e strukturuara kriminale shqiptare po zgjerojnë ndjeshëm aktivitetin e tyre ndërkombëtar, duke e transformuar Afrikën Perëndimore, dhe veçanërisht Senegalin, në një korridor të ri strategjik për trafikun e lëndëve narkotike drejt Europës.
Kjo zhvendosje gjeografike vjen si pasojë e rritjes së presionit dhe vigjilencës nga autoritetet ndërkombëtare mbi rrugët tradicionale të trafikut, duke i detyruar rrjetet kriminale të gjejnë rrugëkalime më të sigurta dhe më pak të monitoruara.
Sipas ekspertit të sigurisë, Fatjon Softa, Afrika Perëndimore është kthyer në një qendër nevralgjike për krimin e organizuar për shkak të institucioneve të dobëta dhe niveleve të larta të korrupsionit. Një fakt tronditës është se në portin e Dakarit në Senegal, kontrollohet vetëm 2% e ngarkesave që hyjnë dhe dalin, duke krijuar një mjedis ideal për trafikantët që të veprojnë me liri pothuajse të plotë.
Kjo ka bërë që sasia e kokainës së kapur në Shqipëri të bjerë, jo sepse trafiku është ulur, por sepse rrugët kanë ndryshuar. Ndërkohë që Shqipëria nuk shihet më si një vend primar tranziti për drogën, ajo mbetet një qendër thelbësore për pastrimin e parave të fituara nga ky aktivitet kriminal. Fitimet marramendëse investohen masivisht në sektorë të ekonomisë formale, si ndërtimi, agjencitë imobiliare dhe turizmi.
Më alarmant, sipas Softës, është fakti se këto grupe kanë filluar të depërtojnë edhe në sektorin e sigurisë ushqimore, duke futur nën kontroll prodhimin dhe duke paraqitur një rrezik të drejtpërdrejtë për shëndetin e qytetarëve. Fuqia e këtyre rrjeteve nuk qëndron vetëm te forca financiare, por edhe te lidhjet e forta politike dhe ndikimi në sistemin e drejtësisë.
Këto lidhje, thekson ndër të tjera eksperti Softa, u mundësojnë atyre të veprojnë pa u ndëshkuar dhe të legjitimojnë pasuritë e tyre të paligjshme, duke bërë që tashmë krerët e këtyre grupeve, shpeshherë nga Ballkani, tani veprojnë si “kapo” të vërtetë, duke drejtuar operacione komplekse ndërkombëtare nga distanca pa pasur nevojë të prekin fizikisht territoret tradicionale të tranzitit.
"Ky informacion që erdhi si rrjedhojë e një medias së huaj, e cila flet dhe shkruan për peshën dhe rolin e grupeve të strukturuara shqiptare, të cilët veprojnë jashtë territorit, edhe nga Senegali, duke e përdorur atë si një korridor kalimi, dhe ata, për të cilët ata flasin që kontrollojnë ato aktivitete politike apo aktivitetet e gjyqësorit, tregon dhe njëherë për peshën dhe fuqinë e këtyre grupeve, të paktën financiarisht dhe e dyta në lidhjet politike, sepse asgjë nuk mund të veprojë vetëm nga pikëpamja financiare, nëse nuk janë dhe lidhjet politike dhe mbështetjet politike. Sigurisht që edhe në territorin shqiptar, këta grupe vazhdojnë të kenë dhe të shfrytëzojnë territorin për këtë lloj komunikimi, sepse komunikimi nuk është telefonik, komunikimi është financiar, komunikimi është edhe politik, sepse fakti që ushtrojnë aktivitete të tilla dhe përdorin kalimin e këtyre kanaleve tashmë nga Senegali, nga Amerika Latine drejt territorit, tregon dhe njëherë për peshën dhe fuqinë e tyre që ato kanë.
Në territorin shqiptar sigurisht që më shumë sesa droga, është pastrimi i parave, sepse droga do të përfundojë në pastrim parash dhe pastrimi i parave vjen mbi bazën e një fuqie që ato kanë, qoftë edhe nga pikëpamja politike, e pushtetit lokal apo tek gjyqësori, sepse operacionet e përbashkëta kanë treguar për lidhje të grupeve me këta struktura, të cilët vijnë jo vetëm thjesht për futjen brenda territorit, shpërndarjen, trafikimin, por edhe pastrimin e parave që ka ardhur nëpërmjet ndërtimit, nëpërmjet agjencive të imobiliare apo nëpërmjet turizmit. Është thënë që është e rrezikshme, sepse këta grupe janë futur dhe në sigurinë ushqimore. Janë futur tek prodhimi dhe kjo është bërë akoma dhe më e rrezikshme që shkon dhe atakon drejtpërdrejtë dhe shëndetin e qytetarëve shqiptarë.
Afrika Perëndimore tashmë është një korridor i ri kriminal, ku lehtësirat që vijnë për shkak të pozicionit që ka nëpërmjet Atlantikut, nëpërmjet Mesdheut, duke përdorur edhe Ballkanin si një rrugë kalimi për të vajtur drejt vendeve të Bashkimit Europian, lehtësirat që e ka për t'u lidhur në lidhje drejtpërdrejt që ka nëpërmjet me Belgjikën, me Spanjën dhe me Francën, e ka bërë të rëndësishme edhe për shkak të nivelit të lartë të korrupsionit në këto vende.
Pra përqëndrimi tek hapësira ballkanike, duke e përdorur këtë hapësirë, sepse ka nivele korrupsioni në vendet e hapësirës ballkanike dhe ky lloj niveli korrupsioni i ka favorizuar ata prej kohësh dhe vitesh që të ndërtojnë atë perandorinë e tyre të trafikimit të lëndëve të forta kryesisht narkotike. Dhe kjo është një korridor jo vetëm thjesht i trafikimit të lëndëve narkotike, por edhe një mënyrë se si ata mund të kenë pastrimin e parave dhe kthimin e parave pastaj nëpërmjet bizneseve informale apo nëpërmjet linjës së ndërtimit apo dhe forma të tjera për t'i kthyer këta në një ekonomi, ku ekonomia e tyre pastaj përfundon në kontrollin e strukturave të shteteve duke i kthyer këto pastaj në funksion të ë aktivitetit të tyre kriminal", tha Softa.
