Kreu i Grupit Parlamentar të PD, Gazment Bardhi ka reaguar për ngjarjen e rëndë të ndodhur në Lozhan, ku mbeti i vrarë nj&e...
AKTUALITET
Agroturizmi "kultivon" sukses, pritshmëritë pozitive për vitin 2025
r.llPërditësimi i fundit 19 Janar 2025, 08:06
foto ilustruese
TIRANË- Kuzhina autentike dhe prodhimet vendase të servirura në mënyrë origjinale mbeten binomi që tërheq pranë vetes të huaj dhe vendas. Viti 2025 pritet të jetë vazhdim i atij që lamë pas.
Interesi turistik për Shqipërinë me një numër në rritje të vizitorëve vit pas viti është shoqëruar me të njëjtin efekt zinxhir edhe te segmenti i agroturizmit.
Njësitë agroturistike të vendosura në rajone të ndryshme të vendit kanë parë rritje të numrit të atyre që i frekuentojnë, qoftë për një vakt autentik, qoftë për një qëndrim më afatgjatë duke kaluar një apo dy net pranë bujtinave.
Për disa agroturizme, ku ka mungesë të theksuar infrastrukture, ku rrjeti energjetik është i dobët, apo kur janë të vetëquajtura të tilla pa ofruar diçka origjinale, mbijetesa është e vështirë.
Ndërsa për agroturizmet e konsoliduara dhe të hapura gjithmonë e më shumë për të dalë jashtë kornizave tradicionale në kërkim të një oferte më gjithëpërfshirëse, e ardhmja duket optimiste.
Agroturizmi, si një sektor mes turizmit dhe bujqësisë, po kultivon sukses falë një qasjeje origjinale të Shqipërisë rurale që për të huajt është mjaft tërheqëse.
Këtë sukses e tregojnë rezervimet afatgjata të bëra pranë këtyre njësive që në vitin 2024 dhe që shkojnë deri në verën e këtij viti.
“Të dhënat nga platformat e rezervimeve na shërbejnë si një lloj sondazhi ku na rezulton se që nga shkurti e deri në prag të verës kemi 30% më shumë rezervime sesa në vitin 2024.
Kemi rezervime që nga muaji dhjetor 2024 për muajin gusht. Gjermanët janë të parët që bëjnë rezervime në avancë në Booking, sepse e kanë pjesë të kulturës së tyre që duan t’i kenë gjërat e organizuara.
Italianët janë gjithashtu në masë, por edhe nordikët”, tregon Mastershef Altin Prenga nga “Mrizi i Zanave”.
Duket se në të njëjtën linjë qëndron edhe Mastershef Fundim Gjepali, nga agroturizëm “Gjepali”, duke nënvizuar se agroturizmet do të vijojnë të kenë vëmendje, pasi të huajt kanë interes që të njohin më shumë këtë anë të vendit tonë, por edhe të provojnë gatime të reja.
Në këtë kontekst, ai vlerëson se për të plotësuar ofertën, agroturizmet duhet të ofrojnë përtej gatimit dhe fjetjes.
“Të huajt kanë shumë kureshtje për fshatin. Nga viti në vit, ne jemi munduar të shtojmë e pasurojmë ofertën tonë në agroturizëm, si në produktet që ofrojmë, edhe në investime funksionale të tij, por vetëm kaq nuk mjafton për të mbajtur gjatë një vizitor.
Ndaj jam angazhuar për të krijuar një itinerar me anët më të mira të zonës së Shijakut ku ndodhemi ne. Po kërkojmë për pikat më të mira historike, ato pamjet më të mira panoramike të kodrinave dhe natyrës dhe të gjithçkaje që na rrethon”, shprehet z. Gjepali.
Në epiqendër gatimi autentik, me produkte të prodhuara vetë apo nga zona
Një agroturizëm nuk është një restorant më shumë në mes të natyrës në një zonë rurale.
Subjektet agroturistike vlerësojnë se ajo që luan rol thelbësor është gatimi sipas recetave autentike, me prodhime të vetë fermës së tyre apo fermave të zonës, me të cilat kanë marrëveshje, të shërbyera në mënyrë origjinale.
Falë këtij kombinimi, agroturizmet janë destinacione të preferuara nga të huajt dhe me vlerësime relativisht të larta.
“Të huajt janë të uritur për produkte autentike. Ajo që servir është kuzhina e shtëpisë dhe e gjyshes, pra siç hamë ne në zonën e Shijakut me pjatat më të njohura, nga tava e dheut te byreku me qumësht, pula me qull apo bakllavaja.
Po mundohem gjithmonë të rishkruaj recetat e vjetra, duke i përshtatur me shijen e klientit. Fakti që jemi në një zonë të caktuar gjeografike, nuk na ndalon të huazojmë dhe të sjellim elementet më të mira të çdo rajoni në vend.
Për shembull, pak vite më parë, bëra një recetë me qoftet pasha e Gjirokastrës dhe rezultati ishte fantastik. Është kënaqësi të shohësh sesi këto receta tonat marrin përshtypje dhe miratim absolut nga të huajt.
Mund të duket banale, por edhe qoftet e fërguara që ne bëjmë, kanë një shije fantastike që nuk e gjen në Europë, të cilat të huajve u duken mjaft të shijshme.
Gatimi dhe servirja janë elemente ku ne mund të fitojmë mjaft pikë, sepse i kemi autentike” shprehet z. Gjepali.
Kreativiteti i kuzhinave në agroturizme është vazhdimisht në evoluim duke shtuar aspekte inovative në receta tradicionale që nuk janë aspak tipike për turistët e huaj.
“Ideja jonë është që duhet pasur rrënjë dhe identitet, por edhe pak inovacion në atë që ofrohet. Janë elemente të vogla, duke përdorur ato që kemi, por gjithmonë duke mbajtur bazën dhe themelet e një kuzhine me identitet.
Për të huajt, çdo gjë që ju shkon në tavolinë janë të gjitha shije të harruara. Janë me shije autentike dhe të prodhuara nga fermerë të vegjël.
Sot vendet me popullsi të madhe ushqehen nga bujqësia intensive dhe kur shohin produkte ndoshta jo të përsosura, por me identitet, japin përshtypje shumë të mira.
E kanë shumë të vështirë të gjejnë diçka të tillë në vendet e tyre”, – nënvizon z. Prenga./MONITOR
