Një aksident rrugor është regjistruar paraditen e kësaj të enjte (4 qershor 2026) në Tiranë, pranë Fabrikës s&eum...
AKTUALITET
Ministri Hoxha përmendi vrasjen e Egli Progës, reagon e motra: Përdhosni kujtimin e vëllait tim duke shtrembëruar dhe fshehur faktet
b.zPërditësimi i fundit 18 Janar 2025, 22:28
Egli Proga
TIRANË - Motra e Egli Progës ka reaguar lidhur me deklaratën e ministrit të Punëve të Brendshme, Ervin Hoxha, i cili në një reagim në rrjete sociale lidhur me ngjarjen e Policit në Tiranë përmendi edhe vrasjen e Egli Porgës në qytetin e Pogradecit.
Ministri Hoxha duke i paralelizuar këto ngjarje me njëra-tjetrën u shpreh se të tilla raste tentohen të fryhen e sipas tij të hidhen aludime për banda inekzistente.
Por kjo deklaratë nuk është pritur mirë nga motra e Egli Progës e cila në një reagim në rrjete sociale shkruan se ministri nuk mund të tallet me vrasjen e vëllati të saj, ndërsa ka akuzuar se policia nuk kap kriminelët por lejon që provat të zhduken.
Statusi i plotë i Jonida Progës:
Dy fjalë për Ministrin e Brendshëm Ti, Ervin Hoxha, që përdhos “ngjarjen e Pogradecit” bashkë me vëllanë tim, lexo dy fjalë nga motra e Egli Progës, që vajton çdo ditë për të. Që kërkon drejtësi! Ti, Ervin Hoxha, ministër me ofiqe shteti s’mund të tallesh me vëllanë tim nën dhe, sikur ai nuk u vra nga një bandë kriminelësh, sikur Egli nuk u masakrua nga një bandë gjobëvënësish, nga një bandë me lidhje në polici, nga disa banditë me lidhje në drejtësi, me njerëz deri lart në qeveri. Policia jote dhe e Rrumbullakut përdhosi kujtimin e vëllait tim në gusht, kur shtrembëroi dhe fshehu faktet. Ti, me paturpësi të pajustifikueshme, shkruan dhe e bën përsëri sot. Policia jote nuk i kapi kriminelët Denis Meçe, Arjan Manellari, Leonidha Guçe dhe Voltan Shkulaku kur masakruan vëllanë tim. I la të lirë të iknin. Policia jote nuk izoloi vendin e ngjarjes, por i la që provat të pastroheshin dhe zhdukeshin bashkë me to edhe autorët deri pas mesnate, kur u dorëzuan vetë me negociatorë ‘nga lart’. Policia jote nuk e gjeti maskarain Denis Meçe derisa atij i doli gjumi dhe e dorëzoi në polici daja i tij, maskarai tjetër me lidhje politike. Valter Gora quhet, a e njeh? Policia jote (të paktën njëri inspektor policie) e Pogradecit është e akuzuar nga prokuroria për atë që ti e quan “dallgë e madhe dezinformimi”. Unë do akuzoj më shumë se një polic, shumë shpejt. Policia jote dështoi në mënyrë të turpshme për kapjen në flagrancë të kriminelëve kur kjo u pa live në TV (si iku me makinën e krimit në sy të policëve Arjan Manellari?), ndërsa ti tentove atëherë dhe vazhdon sot të njëjtin avaz mashtrimi.
A mos po tenton të ushtrosh ndikim të paligjshëm me këtë deklaratë ndaj atyre që po bëjnë hetimin ti, Ervin Hoxha?
Një vrasje që ndodhi në sy të Policisë që ti mbron, është një vrasje që të implikon ty nëse nuk bën kthesë ligjore për të bashkëpunuar me prokurorinë dhe nuk bën kthesë publike për t’i kërkuar falje të gjithëve për këtë dezinformim të poshtër. Ata ishin një bandë gjobëvënësish që pogradecarët kanë frikë të tregojnë vetëm se ti dhe shokët e tu i mbroni me këto deklarata të ngrohta për ata. Ty dhe Rrumbullakut që mendon se shpëtoi nga deklarata e datës 14 gusht, duke ikur fare nga Policia, ju siguroj se të gjithë ata që vranë vëllanë tim, katër janë në burg dhe të gjithë të tjerët që ndihmuan në vrasjen e tij me fshehjen e provave dhe që e dhunuan kujtimin e tij pas vdekjes, nuk do kenë paqe për sa kohë unë jam e gjallë. Në fund, kam një pyetje për ty si njeri e jo si ministër. Nëse një njeri shumë i dashur, do të masakrohej në një lokal nga katër banditë, çfarë do bëje, nëse ata nuk do kapeshin nga Policia, por do liheshin të iknin live nga vendi i krimit? Nëse ti nuk vendos të përgjigjesh, do të përgjigjem unë pa vonesë ligjërisht.
Vrasja e Egli Porgës ndodhur më 10 gusht të këtij viti. Sipas dëshmive të mbledhura nga policia, Egli Proga ka shkuar tek lokali ku ka ndodhur ngjarja, për të pirë. Jashtë lokalit ka qenë autori me dy të tjerë edhe këta të pirë, ndërsa brenda lokalit ka qenë dhe një shtetas vetëm, edhe ai duke pirë.
Egli fillimisht është ulur me personin brenda duke pirë me të dhe në këtë moment ka nisur debati me tre personat që kanë qenë duke pire jashtë kur Meçe u afrua duke kërkuar një cigare. Autori është ngritur nga tavolina e tij dhe ka vajtur tek viktima për ta sqaruar se çfarë kishte dhe debati u acarua. Pas kësaj autori i ka kërkuar të dalë jashtë e të sqarohen dhe kur kanë dalë jashtë autori e ka shtyrë ose goditur viktimën i cili është rrëzuar.
