Në fund të vitit 2025, numri i mjeteve rrugore të regjistruara (me status aktiv ose të çregjistruara përkohësisht) arriti n...
AKTUALITET
Akuzohet për korrupsion, GJKKO shpall fajtore dhe dënon me dy vite burg ish-punonjësen e burgut të Lushnjes Miranda Idrizin
b.zPërditësimi i fundit 28 Janar 2025, 17:10
GJKKO
TIRANË - Gjykata e Posaçme e Shkallës së Parë për Korrupsionin dhe Krimin e Organizuar ka shpallur fajtore dhe ka dënuar me dy vite burg, ish-punonjësen e burgut të Lushnjes Miranda Idrizin. Idrizi akuzohet për “Korrupsioni pasiv i personave që ushtrojnë funksione publike”.
Përpos dënimit me dy vite burg GJKKO ka vendosur për Idrizin edhe heqjen e të drjetës për të ushtruar funksione publike për një kohë prej 5 (pesë) vjet. GJKKO sqaron se vuajtja e dënimit të kryhet në një burg të sigurisë së zakonshme, dhe fillon nga dita që ky vendim të marrë formë të prerë.
Njoftimi:
Prokuroria e Posaçme kundër Korrupsionit dhe Krimit të Organizuar ka paraqitur pranë Gjykatës kërkesën me objekt: “Dërgimin në gjyq të çështjes penale nr. 47, të vitit 2022, në ngarkim të të pandehurës Miranda Idrizi, e akuzuar për kryerjen e veprës penale “Korrupsioni pasiv i personave që ushtrojnë funksione publike”, parashikuar nga neni 259/2 të Kodit Penal.
Gjykimi i kësaj ҫështje u zhvillua me rregullat e gjykimit të shkurtuar. Në përfundim të gjykimit, Gjykata e Posaçme e Shkallës së Parë për Korrupsionin dhe Krimin e Organizuar me trup gjykues të përbërë nga gjyqtaret Flora Hajredinaj, Etleva Deda dhe Rudina Palloj, me vendimin Nr. 9, datë 28.01.2025 vendosi:
Deklarimin fajtor të të pandehurës Miranda Idrizi, për veprën penale “Korrupsioni pasiv i personave që ushtrojnë funksione publike”, parashikuar nga neni 259 paragrafi 2, të Kodit Penal, dhe dënimin e saj me 3 (tre) vjet burgim.
Në bazë të nenit 406 pika 1 të Kodit të Procedurës Penale, të pandehurës Miranda Idrizi i ulet 1/3 e dënimit, për shkak të aplikimit të gjykimit të shkurtuar dhe, përfundimisht dënohet me 2 (dy)vjet burgim.
Vuajtja e dënimit të kryhet në një burg të sigurisë së zakonshme, dhe fillon nga dita që ky vendim të marrë formë të prerë.
Heqjen e së drejtës për të pandehurën Miranda Idrizi, për të ushtruar funksione publike për një kohë prej 5 (pesë) vjet, bazuar në nenin 35 paragrafi 2 të Kodit Penal.
Provat materiale të bashkuara me fashikullin e gjykatës DVD-R me mbishkrimin “47/2022 1 BD-2 from 02.03.2022-to 16.04.2022” me përmbajtjen e bisedave telefonike të përgjuara; një CD e futur në një zarf me mbishkrimin “Mesazh zanor 29.03.2022 R.Z” me përmbajtjen e mesazhit zanor të dorëzuar nga shtetasi R.Z; një CD e futur në një zarf të bardhë me mbishkrimin “Përgjim ambiental dt 03.03.2022” me përmbajtjen e bisedave të zhvilluara në përgjimet ambientale të datës 03.03.2022; një CD e futur në një zarf të bardhë me mbishkrimin “Përgjim ambiental dt 07.03.2022 Elbasan”, me përmbajtjen e bisedave të zhvilluara në përgjimet ambientale të datës 03.03.2022; një CD e futur në një zarf të bardhë me mbishkrimin “Foto MFF proc penal 47 viti 2022” me përmbajtjen e pamjeve filmike, të vëzhgimit fotografimit të zhvilluar në datën 03.03.2022; një CD e futur në një zarf të bardhë me mbishkrimin “Foto video dt 07.03.2022” me përmbajtjen e pamjeve filmike të vëzhgimit fotografimit të zhvilluar në datën 07.03.2022; CD e futur në zarf me mbishkrimin përgjim ambjental datë 29.03.2022 të mbeten pjesë e fashikullit të gjykimit.
Shpenzimet proceduriale ato të kryera gjatë fazës së hetimit paraprak në shumën prej **** euro dhe **** lekë sipas procesverbalit mbi shpenzimet proceduriale të procedimit penal nr. 47/2022, datë 25.11.2024, si dhe ato të kryera gjatë shqyrtimit gjyqësor, sipas procesverbalit bashkëngjitur këtij vendimi i ngarkohen të pandehurës Miranda Idrizi.
Kundër këtij vendimi lejohet ankim në Gjykatën e Posaçme të Apelit për Korrupsionin dhe Krimin e Organizuar, brenda 15 (pesëmbëdhjetë) ditëve, nga e nesërmja e njoftimit të vendimit të arsyetuar.
