Kryeministri Edi Rama ka ndarë mëngjesin e sotëm në rrjetet sociale një video që I është dërguar nga një qyt...
AKTUALITET
Apeli i GJKKO lë në burg Sabah Nuzin, i akuzuar për vrasjen e Klevis Lleshit/ Ja zinxhiri i hakmarrjes mes dy fiseve
PiranjatPërditësimi i fundit 21 Tetor 2025, 11:15
Apeli i GJKKO ka lënë në fuqi masën e sigurisë "arrest në burg' për Sabah Nuzin, i arrestuar në shtator të këtij viti me urdhër të SPAK, për përfshirjen në vrasjen e Klevis Lleshit. 22-vjeçari u gjet i groposur dy vite pas zhdukjes së tij, ndërsa hetimet zbuluan se ekzekutimi i tij ishte një akt i mirëorganizuar i një hakmarrjeje të gjatë ndërmjet dy fiseve, Hoxha dhe Lleshi.
Sipas SPAK, Nuzi ishte ekzekutori dhe kishte marrë 50 mijë euro për vrasjen e Lleshit nga porositësi Aurel Hoxha, i cili ndodhet ende në kërkim. Në pranga ranë edhe dy të tjerë: Samet Loka dhe Sajmir Kolaveri, ky i fundit i arrestuar në Itali, që kishin rol ndërmjetësimi dhe ndihmës në realizimin e krimit.
Sabah Nuzi, 31 vjeç, rezulton me precedentë të shumtë penalë. Në vitin 2020 u arrestua nga Policia e Matit për kërcënim dhe armëmbajtje pa leje, ndërsa në vitin 2012 ishte ndaluar për plagosjen me armë të tre personave.
Hakmarrja mes dy fiseve që nisi në Britani
Ngjarja tragjike është pjesë e një zinxhiri hakmarrjesh që nisi jashtë kufijve të Shqipërisë, në Londër. Konflikti midis dy familjeve nisi me vrasjen e Agim Hoxhës, i cili u gjet i djegur në makinën e tij në Mbretërinë e Bashkuar. Hetimet britanike zbuluan se ai ishte vrarë më parë dhe më pas ishte vendosur në makinë për të fshehur gjurmët. Si autorë të krimit u arrestuan Arben dhe Afrim Lleshi – ky i fundit për deklarata të rreme për të mbrojtur vëllanë.
Arben Lleshi e pranoi vrasjen, por mohoi djegien e trupit. Ai u dënua me 32 vite burg dhe në vitin 2016 u ekstradua në Shqipëri për të vuajtur pjesën e mbetur të dënimit. Megjithatë, drejtësia nuk e ndali zinxhirin e gjakut.
Historia e gjakmarrjes: viktimat njëra pas tjetrës 2013 – Vritet Xhavit Lleshi, babai i Arbenit, në një atentat në Pujkë, Burrel. 2016 – Ekzekutohet Hajredin Lleshi, vëllai i Xhavitit, në fshatin e lindjes. 2017 – Rrëmbimi i Artan Lleshit, djali i Hajredinit, në Burrel. Ai u pa për herë të fundit në Kamëz dhe rezulton i zhdukur. 2020 – Zhduket Klevis Lleshi, trupi i të cilit u gjet i groposur dy vite më vonë. Ai ishte goditja e radhës e fisit Hoxha. 2023 – Arben Lleshi, i dënuar për vrasjen e Agim Hoxhës, vritet brenda burgut të Peqinit.
Ndërkohë që Apeli ka lënë në fuqi masën për Sabah Nuzin, hetimet e SPAK vijojnë për zbardhjen e plotë të këtij rrjeti hakmarrjesh dhe për gjetjen e Aurel Hoxhës, i cili konsiderohet truri i ekzekutimit të fundit. Policia dhe prokuroria janë në kërkim të bashkëpunëtorëve të tjerë të përfshirë në këtë sagë kriminale që përfshin krime brenda dhe jashtë vendit.
