Situata e zjarreve në Shqipëri vijon të kërkojë ndërhyrje në disa zona të vendit.
Sipas Ministrisë së Mbroj...
AKTUALITET
Apeli liron nga qelia ish-drejtorin e dosjes 5D. Zbardhet motivi i vendimit
PiranjatPërditësimi i fundit 10 Tetor 2025, 17:50
Gjykata e Posaçme e Apelit vendosi të premten të zbusë masën e sigurimit personal ndaj ish-drejtorit të UKT-së së Bashkisë së Tiranës, Redi Molla, i akuzuar se së bashku me ish-drejtorin tjetër të kësaj bashkie, Mariglen Qato dhe pesë persona të tjerë, krijuan një skemë korrupsioni e pastrimi parash të kryer nëpërmjet kompanisë 5 D Konstruksion.
Gjyqtarja Iliriana Olldashi vendosi zëvendësimin e masës së sigurimit arrest në burg, me atë të arrestit shtëpiak, bazuar në kërkesën e Mollës se ishte në gjendje të rëndë shëndetësore. Po ashtu, gjyqtarja Olldashi ka vendosur lirimin e menjëhershëm të Redi Mollës nga qelia dhe e ka urdhëruar atë të mos largohet nga banesa. Qëndrimi në masën e sigurimit personal “arrest shtëpie”, në vendimin përfundimtar përllogaritet si vuajtje dënimi në qeli.
Çështja penale në ngarkim të Mollës dhe të pandehurve të tjerë u regjistrua për veprat penale të korrupsionit aktiv dhe pasiv, mosdeklarime, deklarime të rreme apo fshehje të pasurive, shkelje të barazisë në tendera dhe pastrim parash.
Sipas SPAK, është provuar se i pandehuri Redi Molla, në cilësinë e ish-drejtorit të përgjithshëm të shoqërisë Ujësjellës Kanalizime Tiranë sh.a, si dhe i pandehuri Mariglen Qato si ish-drejtor i departamentit mbështetës në këtë shoqëri dhe në cilësinë e ish-kryeinspektorit të IKMT në Bashkinë Tiranë, kanë qënë pronarët “de facto” të shoqërisë 5D Konstruksion sh.p.k., të cilën e kanë zotëruar në mënyrë indirekte dhe e kanë përdorur për të vjelë fondet publike në mënyrë të paligjshme e për pastrimin e parave.
Gjatë seancës paraprake të zhvilluar më 4 prill, Gjykata e Posaçme e Shkallës së Parë nuk e pranoi kërkesën për gjykimin e shkurtuar në çështjen në ngarkim të Redi Mollësh e Mariglen Qatos, që lidhet me aferën e kompanisë 5D. Gjykimi është në fazën e pyetjes së dëshmitarëve të thirrur nga prokuroria, ku mes tyre paraqiti deklarimet e tij në seancën më 2 tetor edhe ish-nënkryetari i Bashkisë së Tiranës, Arbjan Mazniku, i cili shmangu nga vetja përgjegjësinë për tenderat e fituar nga 5D, duke ua ngarkuar ekspertëve të fushave respektive. /Birn/
