Ditën e nesërme janë paralajmëruar dy protesta të njëpasnjëshme, në Zvërnec dhe në Tirana, me qytetarët...
AKTUALITET
Banorët e Baks-Rrjollit në protestë para SPAK, godasin me vezë godinën
PiranjatPërditësimi i fundit 11 Mars 2026, 10:47
Banorët e Baks Rrjollit në Shkodër kanë zhvendosur protestën e tyre para Strukturës së Posaçme Antikorrupsion (SPAK) në Tiranë, duke kundërshtuar ndërtimin e një resorti turistik në atë që ata pretendojnë se është toka e tyre e trashëguar brez pas brezi.
Kjo është hera e dytë brenda pak javësh që banorët i drejtohen SPAK-ut.
Ata kanë depozituar një kallëzim penal për veprat e “uzurpimit të pronës” dhe “korrupsionit”, pasi se leja për zhvillimin e resortit është dhënë në bazë të dokumenteve të falsifikuara dhe në shkelje të ligjit.
Me pankarta në duar ku shkruhej “Toka e trashëguar brez pas brezi” dhe “Ne besojmë tek SPAK”, protestuesit kërkuan vëmendjen e organeve të drejtësisë.
Një përfaqësi e tyre, së bashku me avokatët, u futën në ambientet e brendshme të institucionit për të kërkuar një takim me prokurorët e çështjes.
Një prej protestuesve u shpreh se kjo ishte hera e tretë që paraqiteshin dhe ende nuk kishin marrë asnjë përgjigje nga SPAK apo prokuroria e Shkodrës, duke kërkuar vetëm drejtësi.
Tensioni ishte i lartë, teksa një tjetër banor deklaroi prerë: “Tash ka ardhur koha, duam drejtësi, nuk ka më muhabete. O ata në burg, o ne në burg. S’ka rrugë tjetër më.”
Po ashtu, një tjetër qytetar me prona në Vlorë, kritikoi legjislacionin për pronat, specifikisht ligjin 133/2015, i cili sipas tij ka lënë pa trajtuar mbi 7200 dosje, duke e cilësuar Velipojën një “perlë” që nuk duhet të tjetërsohet.
