Në fjalën e saj në Kuvend Ina Zhupa ka mbajtur një qëndrim të ashpër ndaj qeverisë Rama.
Zhupa theksoi se ësht&e...
AKTUALITET
Biznesi nga Kosova po shton praninë në Shqipëri
n.fPërditësimi i fundit 7 Qershor 2024, 07:59
Foto ilustruese
TIRANË- Sipërmarrja nga Kosova po shfaq interes në rritje për tregun shqiptar. Së fundmi, kompania më e hershme e shitjeve nëpërmjet kanaleve elektronike (kryesisht televizionit), Top Shop (Studio Moderna Albania) është blerë nga kompania SMA Holding, në pronësi të biznesmenit nga Kosova, Xhevdet Rexhepi.
Xhevdet Rexhepi është pronari i Viva Fresh, rrjetit më të madh të supermarketeve në Kosovë. SMA Holding ka blerë njëkohësisht degët e Studio Moderna edhe në Kosovë, Malin e Zi dhe në Maqedoninë e Veriut. Shitësi ishte Studio Moderna Holdings Investments B.V, një shoqëri holding e regjistruar në Hollandë, në pronësi të biznesmenit slloven, Sandi Češko.
Studio Moderna Albania nisi aktivitetin e tij në Shqipëri në vitin 2003 dhe u bë e njohur nëpërmjet tregtimit të markave të veta nëpërmjet spoteve televizive. Shuma e shitjes nuk është bërë publike, ndërsa transaksioni është miratuar në fund të tremujorit të parë të këtij viti edhe nga Autoriteti i Konkurrencës.
Sipas pasqyrave të fundit financiare të publikuara, aktiviteti i Studio Moderna Albania erdhi në rënie gjatë vitit 2022, ndërsa edhe rezultati financiar u përkeqësua. Xhiroja totale kishte vlerën e 623 milionë lekëve, në rënie me pothuajse 35% krahasuar me një vit më parë. Viti u mbyll me një humbje neto në vlerën e 59 milionë lekëve, përkundrejt një fitimi prej rreth 50 milionë lekësh për vitin 2021.
Të dhënat e Bankës së Shqipërisë tregojnë se për vitin 2023, Kosova u rendit si investitori i pestë më i madh i huaj në Shqipëri, me një fluks investimesh të reja prej 73 milionësh euro, në rritje me 16% krahasuar me një vit më parë. Investimet kosovare në vitet e fundit po ndjekin një tendencë të dukshme në rritje.
Kompani të rëndësishme kosovare janë të pranishme kryesisht në sektorin e tregtisë. Stoku i investimeve kosovare ka arritur në 307 milionë euro, në rritje me 45% gjatë vitit të kaluar. Sipas të dhënave nga Instituti i Statistikave (INSTAT), vitin e kaluar në Shqipëri vepronin 519 biznese me aksionarë shtetas nga Kosova.
Numri i ndërmarrjeve me aksionarë nga Kosova u rrit me 11% krahasuar me një vit më parë. Kosova renditej si investitori i dytë për nga numri i kompanive të regjistruara në Shqipëri, pas Italisë. 80% e ndërmarrjeve nga Kosova vepronin në sektorin e shërbimeve dhe 20% në aktivitete të prodhimit të mallrave.
