Gazetarja e njohur e Vlorës, Afrovita Hysaj ka treguar momentet e fundit të kolegut dhe mikut Enrik Mehmeti drejt Zvërnecit, mbrëmjen e t&...
AKTUALITET
Bonusi i bebeve/ Janë shpenzuar 148 mln euro, gati gjysma i kanë marrë ata që jetojnë jashtë
n.fPërditësimi i fundit 22 Maj 2024, 14:37
Foto ilustruese
TIRANË- Vitin e kaluar nga 42,740 bebe përfituese të bonusit, rreth 46% e tyre ishte për lindjet jashtë Shqipërisë, sipas të dhënave të raportit të Monitorimit të Ministrisë së Shëndetësisë dhe Mbrojtjes Sociale. Në total, për vitin 2023, fondi i shpërndarë ishte rreth 33 milionë euro.
“Fondet në dispozicion për bonusin e bebes për vitin 2023 janë 3,305,516 mijë lekë. Fonde këto që mbulojnë pagesat për 42,740 lindjet gjatë vitit 2023 (22,992 lindje brenda vendit dhe 19,748 lindje jashtë vendit)”, thuhet në raportin e monitorimit të publikuar nga Ministria e shëndetësisë.
Edhe në vitin 2022, nga 42,504 përfitues të bonusit, rreth 43% e tyre ishin për lindjet jashtë. Fondet në dispozicion për bonusin e bebes për vitin 2022 (i korrektuar) janë 3,100,000 mijë lekë. Fonde këto që mbulojnë pagesat për nënat që kanë lindur 42,504 bebet (24,337 lindje brenda vendit dhe 18,167 lindje jashtë vendit) për vitin 2022 sipas të dhënave zyrtare.
Për 2021 rreth 38% të përfituesve ishin të lindur jashtë vendit. Sipas të dhënave zyrtare fondet në dispozicion për bonusin e bebes për vitin 2021 ishin 3,303,110 mijë lekë. Fonde këto që mbuluan pagesat për nënat që kanë lindur 43,441 bebet (26,990 lindje brenda vendit dhe 16,451 lindje jashtë vendit) gjatë vitit 2021.
Për shkak të numrit të lartë të përfituesve të porsalindur jashtë vendit, vitin e kaluar qeveria ndryshoi politikat sociale për shpërndarjen e bonusit të bebeve, një program që ka nisur zbatimin prej 2019-s.
Sipas ndryshimeve në ligjin “Për një shtesë dhe një ndryshim në Ligjin Nr. 57/2019 “Për Asistencën Sociale në Republikën e Shqipërisë” të miratuar nga Kuvendi i Shqipërisë në tetor 2023, u përjashtuan nga përfitimi të porsalindurit që nuk janë rezidentë në Shqipëri.
Në katër vjet janë dhënë 148 milionë euro
Në total prej vitit 2019 deri më 2023 sipas të dhënave të raporteve të monitorimit të publikuar nga Ministria e Shëndetësisë janë shpërndarë rreth 14,8 miliardë lekë apo 148 milionë euro për programin e bonusit të bebes.
Programi “Bonusi i bebes” mbështet familjet nëpërmjet dhënies direkte të çekut që tërhiqet nga nëna, me vlerën e 40 mijë lekëve për fëmijën e parë, 80 mijë lekë për fëmijën e dytë dhe 120 mijë lekë për fëmijën e tretë.
