Teksa vendi ynë prej 53 ditësh po përballet me protesta masive, ku kërkohet dorëheqja e kryeministrit Edi Rama, mesazhi i arkitekti i...
AKTUALITET
Borxhet e RTSH-së/ Nga Beniada te Kozeta Kurti e Nazarko, sa paguheshin “VIP-at” (FATURAT)
PiranjatPërditësimi i fundit 15 Shtator 2025, 10:05
Kur Eni Vasili mori drejtimin e Radio Televizionit Shqiptar në fund të prillit 2025, të gjithë e dinin se institucioni kishte probleme serioze me funksionimin e brendshëm dhe strukturën në tërësi, ashtu si edhe probleme të caktuara financiare.
Por, pakkush mund ta pandehte se transmetuesi publik në vend, ishte kthyer në një “gropë thithëse” të vërtetë, me neglizhenca prej drejtuesve madhorë, me shuma të mëdha të kërkuara për emisione dhe me abuzimet shqetësuese për një institucion që mbahet më këmbë me paratë e taksapaguesve.
Përmasa të mëdha veçanërisht, këto probleme të brendshme të RTSH-së, morën në çastin kur persona të kontraktuar për projekte nga jashtë strukturës së transmetuesit, filluan të ankoheshin për rrogat e prapambetura me muaj.
Prej tyre, një ndër, ishte Kozeta Kurti, autore dhe drejtuese e një projekti në formë emisioni javor në RTSH, e cila shprehu indinjatën për lënien pa pagesë për pesë muaj për punën e saj, duke ngjallur kështu zhurmën e madhe mediatike rreth rastit.
Megjithatë, e pyetur për rrethanat e situatës, drejtuesja e RTSH-së, Vasili, pohoi për Albanian Post se ka pasur probleme me pagesat, por vetëm kur bëhet fjalë për honorarë të punonjësve të projekteve të jashtme dhe jo lidhur me punonjësit e brendshëm të RTSH-së, për të cilët shpjegoi se data e pagesës së tyre nuk ka lëvizur asnjëherë dhe institucioni ka qenë korrekt.
Por, çfarë fshihet në gjithë këtë zhurmë mediatike dhe luftë të vetëshpallur ndaj institucionit dhe drejtueses së re të tij? E vërteta e plotë, është vetëm një!
Rasti Kurti
Nuk ka përligjje për lënien e punonjësve pa paga. Kjo gjë duhet bërë e qartë prej fillimit.
Por nuk mund të ketë as anashkalim të përgjegjësive të paraardhësve dhe gabimeve që mund t’i kushtojnë një institucioni më shumë edhe se vetë emri dhe pesha që mbart në opinion.
Kozeta Kurti, e cila kërkon të shpaguhet prej pesë muajsh për disa seri emisionesh të realizuara, është pak të thuhet se kërkon shuma të padëgjuara për një program me plot probleme, pa esencë dhe me shikueshmëri të ulët.
Në një preventiv të bërë publik, Kurti paraqet kërkesat, të cilat shkojnë në një total prej 4 milionë e 816 mijë lekësh, ose përafërsisht 50 mijë euro në kursin aktual të këmbimit.
Ajo vetë e artikulon këtë si një shumë përtej përfitimeve personale dhe veten e liston si përfituese të një shume prej “vetëm” 700 mijë lekësh (7 mijë euro), si skenariste dhe drejtuese për 12 emisione të këtij projekti. E më tej, ndan shumat në 2 milion e 100 mijë lekë (21000 euro) mes instrumentistësh, drejtor programi në shumën e 826 mijë lekëve, aktorëve, gazetarëve, montazhierëve etj..
Por, ky është thjesht preventivi…
Në një dokument që Albanian Post zotëron dhe po e publikon për herë të parë, është historia e pagesave të miratuara.
Shkresa e 10 qershorit 2025, tregon urdhrin për të shlyer detyrimet ndaj emisionit “Ditari i një artisti”, për katër javët e muajit prill, për të cilat AP mëson se Kurtit ende nuk i është shlyer shuma. Pagesa e fundit ka qenë e marsit.
Vetëm pagesa për Kurtin megjithatë, sipas dokumentit, rezulton të jetë në shumën tërësore prej 200 mijë lekësh (2000 euro), ndarë në 120 mijë lekë si skenariste dhe 80 mijë lekë si drejtuese emisioni. Pra, Kurti rezulton të jetë paguar kaq, për katër emisionet e marsit dhe do të paguhet edhe për pjesën e prillit.
E gjitha kjo në një kohë kur Kurti ka qenë drejtuese e këtij projekti të jashtëm, por njëkohësisht ka ushtruar funksione edhe në struktura të tjera televizive.
Drejtori i programit, Alkid Erkocaj, rezulton ndërkaq të paguhet për katër programe në shumën e 236 mijë lekëve (2400 euro).
Teksa, 15 persona të tjerë, mes instrumentistësh, këngëtarësh, aktorësh, apo mjeshtër montazhi, paguhen po ashtu në shuma të konsiderueshme.
Në total, vetëm për prillin, formati i Kurtit fiton një shumë prej 1 milion e 376 mijë lekësh (rreth 14 mijë euro).
Shuma për prillin, ashtu si kuptohet, do të shlyhet më tej.
Në çastet kur duhet menduar se RTSH-ja mbahet me kontributet e qytetarëve, duhen shtruar disa pyetje mbi kërkesat e autorëve të emisionit, por edhe të drejtuesve të mëparshëm, duke theksuar mbi të gjitha ish-zëvendësdrejtuesen e RTSH-së, Aurora Polo, e cila ka pasur peshë madhore në miratimin e projekteve.
Rasti ‘Një Shqipëri’
Një tjetër emision në RTSH është ai “Një Shqipëri”, me autorë Mentor Nazarkon dhe Xhafer Rakipllarin.
Për periudhën Mars-Korrik 2025, është kërkuar të paguhen honorarët, sipas një dokumenti zyrtar të zotëruar nga Albanian Post.
Për skenaristët e emisionit, Mentor Nazarko dhe Xhafer Rakipllari, për tetë emisione kërkohet të shlyhet shuma e 192 mijë lekëve (2000 euro). Nazarko, merr po ashtu 144 mijë lekë (1450 euro) të tjera për tetë emisione, së bashku me bashkëdrejtuesen, Oneda Skënderi. Totali i Nazarkos për tetë emisione shkon kështu në 336 mijë lekë (afërsisht 3500 euro).
Më pas në listë janë edhe pagesat për gazetarë, të ftuar e aktorë, në shuma të ndryshme. Shuma nuk është shlyer ende dhe do paguhet së shpejti.
Ajo që shihet me shqetësim në këtë rast, është një “teprim” i kërkesave për këtë emision, i cili pavarësisht faktit se transmetohet vetëm dy herë në javë, kërkon dy skenaristë dhe dy drejtues emisioni, me honoraret maksimale që RTSH-ja alokon për projekte të jashtme.
‘Garderoba e artë’
Në një dokument më vete të parë nga Albanian Post, mund të shihet natyra e shkujdesjes edhe me kostumet e kërkuara për drejtuesit e emisioneve.
Tabela e paraqitur, e cila tregon listimet për porosi kostumesh, por jo një kontratë të mirëfilltë, zbulon se si ato janë porositur pranë stilistit Altin Mici.
Disa porosi janë pjesë e dokumentit, përfshi një faksimil që Albanian Post zotëron, ku kostumet shkojnë në vlerën e 1 mijë eurove copa dhe këmishat në vlerën e 250 eurove copa.
Për më tej, edhe rreth një anomalie si listimi i shamive të xhaketave në vlerën e 50 eurove copa.
Një tjetër tregues i abuzimeve që kanë ndodhur me RTSH-në dhe e kanë dërguar në gradën e sotme të një situate kritike institucionin kryesor mediatik në vend, pa menduar se si pakujdesia me menaxhimin e fondeve, deri në detaje për garderoba të tilla me vlera përtej normales.
“Armiqtë e pasdites”
Një shembull tjetër i zallamahisë në RTSH është edhe emisioni i pasdites, i emërtuar “Miqtë e Pasdites”, por që më së shumti duket se ka shkaktuar dëme, edhe përtej thelbit të një emisioni ku në ekranin publik vështirë të merren vesh fjalët shqip, prej prezantueses së pa artikulueshme në gjuhë zyrtare si shkak i qëndrimit të gjatë në Itali.
Imazhi i emisionit është ish-konkurrentja e formatit “Big Brother”, Beniada Nishani.
Ajo paraqitet qoftë si skenariste, qoftë si drejtuese e emisionit dhe për muajin prill, për 22 emisione, kërkohet t’i disbursohen shumat e 265 mijë e 320 lekëve dhe 122 mijë e 980 lekëve, për një total prej 388 mijë e 300 lekë (4000 euro).
Ndërkohë, një tjetër skenariste është në bordero, e cila për 22 emisione paguhet me 330 mijë lekë. E së bashku me shumat e paguara për personazhe në emision, totali i një muaji për emisionin (i cili duket se nuk ka nevojë për gazetarë sipas borderosë), shkon në 893 mijë e 960 lekë (9000 euro).
Këto janë vetëm disa prej shembujve nga kontratat e panumërta në RTSH, të cilët janë lidhur pa teklif nga drejtuesit e mëparshëm dhe që e kanë sjellë sot institucionin në gjendjen e mjerueshme financiare.
Por, dëmi edhe më i madh është shkaktuar gjetkë dhe për këtë Albanian Post do të publikojë dokumentet dhe faksimile me Unionin Evropian të Transmetimit, ku vërtetë RTSH gjendet në mos në mëshirë të fatit për vijimin e kontratës, në një rrugë shumë rigoroze të politikave strikte që duhen ndjekur për rimëkëmbjen./Albania Post
