Situata e zjarreve në Shqipëri vijon të kërkojë ndërhyrje në disa zona të vendit.
Sipas Ministrisë së Mbroj...
AKTUALITET
Depozitimi i mbetjeve toksike në Durrës/ Banorët e zonës të shqetësuar, paralajmërojnë protesta: Na kanë sjellë helme! Të largohen mbetjet, ose të largohemi ne
n.fPërditësimi i fundit 16 Nëntor 2024, 17:04
Banori
DURRËS- Pas mbërritjes së mbetjeve toksike në Portin e Durrësit pasi u refuzuan nga autoritetet Tajlandeze, këto 2100 ton mbetje janë depozituar në Durrës. Për shkak edhe të rrezikshmërisë së tyre pasi mbetjet dyshohet se janë toksike banorët e venddepozitimit kanë shprehur shqetësimin e tyre.
Ata janë shprehur shumë të shqetësuar dhe kanë bërë me dije se do të dalin në protestë nesër, të dielën. Sipas tyre protesta do të jetë paqësore dhe nëse nuk marrin përgjigje do të zhvillojnë protesta të tjera para bashkisë së Durrësit.
“Më të shqetësuar se jemi nuk ka ku shkon më. Këto janë lëndë të rrezikshme. Media ka raportuar për to, jo vetëm në Shqipëri por dhe jashtë. Po shikoni, këtu ka lëndë të rrezikshme gjithandej. Të dielën do të bëjmë një protestë paqësore dhe, nëse nuk marrim përgjigje, protesta tjetër do të jetë para bashkisë se nën juridiksionin e saj jemi" thanë banorët.
Më tej ata shtuan se ata u kompensuan këtu kur ui përmbyt toka tek liqeni i Fierzës ndërsa shtuan se kanë vite që po përballen me mbeturina.
“Na kompensuan këtu kur na u përmbyt toka tek liqeni i Fierzës, dhe kemi vite duke u përballur me mbeturina. Tani na kanë sjellë edhe helmet. Ne do të dalim të kërkojmë që ose të largohen mbetjet, ose të largohemi ne”, thanë qytetarët.
Me shqetësimin qytetar për ndikimin e mbetjeve në mjedis dhe shëndetin e njerëzve, në zonë u shfaq edhe përfaqësuesja e Partisë Demokratike, Jola Hysaj. Ajo u shpreh se nuk mund të lejojnë që në një qytet historik dhe turistik si Durrësi, ku rrezikshmëria e lëndëve është kaq e lartë, të vazhdojë kjo situatë.
“Pas meje ndodhet venddepozitimi. Mbetjet janë shumë pranë banesave dhe tokave ku kullosin kafshët. Qytetarët kanë të drejtë të ndihen të shqetësuar. Edhe ne që jetojmë në qytet jemi. Nuk mund të lejojmë që në një qytet historik dhe turistik si Durrësi, ku rrezikshmëria e lëndëve është kaq e lartë, të vazhdojë kjo situatë”, tha Jola Hysaj.
Edhe anëtarë të Këshillit Bashkiak të Durrësit kanë kërkuar transparencë nga Prokuroria, por sipas tyre ende nuk kanë marrë një përgjigje. Këshilltari i bashkisë, Jonuz Myshketa, tha se kjo situatë i prek të gjithë, ndaj dhe Bashkia nuk duhet të heshtë.
“Është shqetësim i gjithsecilit, po si përfaqësues të tyre, të zgjedhur me votë, kemi kërkuar të monitorojmë situatën dhe të jemi të pranishëm në marrjen e kampionëve, të sigurohemi që mbetjet të analizohen në laboratorë të pavarur për të kuptuar rrezikshmërinë reale. Heshtja e bashkisë është e pakuptimtë dhe po dëmton qytetarët”, tha Myshketa.
