Pika e Kalimit Kufitar Kapshticë do të ndërpresë përkohësisht funksionimin të hënën, më 27 korrik, nga ora 0...
AKTUALITET
“Deputeti që i shpëtoi Ramës kuorumin, merr ‘shpërblimin’: Leje ndërtimi 8-katëshe në Fier”
PiranjatPërditësimi i fundit 23 Nëntor 2025, 14:52
Në 3 Tetor 2024, i gjithë grupi parlamentar demokrat bllokoi hyrjen e Parlamentit, në formë reagimi për burgimin e kolegut të tyre, Ervin Salianji, si edhe në shenjë proteste për përjashtimin me nga 40 deri në 60 ditë të plot 24 ligjvënësve opozitarë. Seanca plenare e asaj dite ishte në prag dështimi, pasi në sallë ishin vetëm 69 deputetë socialistë, një numër më i ulët se kuorumi i nevojshëm prej 71 të tillë.
Por, dy deputetë, të dalë nga lista e opozitës, por që përfaqësonin Partinë për Drejtësi, Integrim dhe Unitet (PDIU), Nustret Avdulla dhe Gëzim Ademaj, arritën t’i përvidhen kordonit të demokratëve dhe hynë në sallë, duke krijuar kuorumin e nevojshëm dhe seanca vijoi normalisht.
Në foto: Ish-deputeti Nustret Avdullaj
Në atë ditë, Parlamenti nuk kishte në rend dite projekt-ligje të rëndësishme. Megjithatë, pjesëmarrja e dy deputetëve “opozitarë” në atë seancë, u përdor nga socialistët për të treguar se ata ishin në gjendje të siguronin shumicën e nevojshme edhe në kushtet e bllokimit nga demokratët.
Kjo ishte një “fitore” interesante për kryesocialistin dhe njëkohësisht kryeministrin Edi Rama, i cili duket se nuk ka harruar t’ia kthejë nderin, të paktën njërit prej tyre.
Për këtë “shërbim politik”, kryesocialisti Edi Rama e vendosi emrin e Nustret Avdullaj në listën e hapur të kandidatëve për deputetë në Qarkun e Fierit, në zgjedhjet parlamentare të 11 Majit 2025. Ai nuk arriti të fitojë mandatin e ligjvënësit, por, tashmë ka siguruar një leje të rëndësishme ndërtimi, me firmën e Edi Ramës.
Rama, leje për ish-deputetin
Në 16 Korrik 2025, Këshilli Kombëtar i Territorit (KKT), nën drejtimin e kryeministrit Rama, ka marrë në shqyrtim kërkesën “Leje Ndërtimi për objektin: “Objekt banimi dhe shërbimi 5 dhe 8 kate mbi tokë me 1 kat nëntokë”, me vendndodhje në Rrugën “Dino Kalenja”, Bashkia Fier, me subjekt zhvillues shoqërinë “Nba Cotto” sh.p.k”.
Në foto: Këshilli Kombëtar i Territorit shqyrtoi aplikimin e “Nba Cotto” shpk në 16 Korrik 2025
Shoqëria zhvilluese “Nba Cotto” është në pronësi të 24-vjeçarit Sulgen Avdulla, djali i ish-deputetit Nusret Avdulla.
Përtej pronësisë formale, disa dokumenta të siguruar nga “Boldnews.al” krijojnë dyshimet se shoqëria investitore është nën kontrollin e ish-deputetit, Nusret Avdulla.
Subjekti “Nba Cotto” është themeluar në vitin 2003 dhe Nustret Avdulla ka qenë një prej ortakëve themelues të saj. Në vitin 2012, Nustreti mori në pronësi të gjithë aksionet e shoqërisë.
Ai mbajti pozicionin e ortakut të vetëm deri në vitin 2022, kur tashmë kishte marrë edhe mandatin e deputetit.
Në foto: Kontrata e dhurimit mes Nustret Avdullaj dhe djalit të tij, Sulgen Avdullaj, viti 2022
Angazhimi parlamentar duket se e pengonte Nustret Avdullain që të vijonte të menaxhonte drejtëpërdrejtë veprimtarinë ekonomike të shoqërisë së tij.
Për këtë arsye, në 3 mars 2022, ai ia dhuron 100 përqind të aksioneve, djalit, Sulgen Avdullaj, në atë kohë vetëm 21-vjeçar.
Leja si “shpërblim”
Leja e ndërtimit, si rregull, është një e drejtë, të cilën mund ta fitojë cilido që përmbush kriteret ligjore e teknike. Por, në “Shtetin e Edi Ramës”, ka shumë akuza publike dhe jo vetëm, që lejet e ndërtimit jepen në formën e “favorit”, “qokës”, “tarafit” apo “interesit”.
Edhe leja e ndërtimit për shoqërinë “Nba Cotto” duket se është pjesë e të njëjtit sistem.
Kompania investitore, thuajse në të gjithë jetën e saj ekonomike, ka qenë e përqendruar në përpunimin e argjilës dhe poçarisë, një sipërmarrje interesante, aq më tepër në një drejtim ekonomik që është gjithnjë e më i rrallë.
Por, në nëntor të vitit 2024, pronari i ri, Sulgen Avdullaj, djali i deputetit të asaj kohe, Nustret Avdullaj, vendos të realizojë një hap të rëndësishëm në aktivitetin e saj tregtar.
Në objektin e “Nba Cotto” shpk shtohet edhe shënimi: “Ndërtime civile, turistike, industriale, bujqësore-rikonstruksione. Ndërtime banesash shumëkatëshe”.
Në foto: Kompania “Nba Cotto” shtoi “ndërtimin” në objektin e saj, në nëntor 2024
Për një rastësi interesante kohore, djali, Sulgen Avdullaj, përfshin “ndërtimin” në aktivitetin e kompanisë, pikërisht në kohën kur babai, Nustret Avdullaj, i bëri “nder” Edi Ramës dhe maxhorancës socialiste, duke hyrë në Parlament si “opozitar”, ndërkohë që deputetët e pakicës qëndronin në protestë para Parlamentit.
E, vetëm pak muaj pas këtij ndryshimi, kompania “Nba Cotto” aplikon pranë Këshillit Kombëtar të Territorit, të drejtuar nga Rama, për leje ndërtimi pallati 8-katësh në qendër të Fierit.
